A.Batalov bul nysannyń Elbasynyń 100 dene shynyqtyrý-saýyqtyrý keshenin salý týraly jáne Prezıdenttiń Joldaýyndaǵy barlyq jastaǵy el azamattary arasynda buqaralyq sportty damytý týraly tapsyrmalaryna sáıkes ashylyp otyrǵanyn tilge tıek etti.
- Zamanǵa saı dene shynyqtyrý-saýyqtyrý kesheniniń ashylýy - kópten kútken qýanyshty jańalyq. Buryn Qarabulaqtyń sportshy jastary arnaıy oryn bolmaǵandyqtan, sporttyq oıyndardy turmystyq zaldarda, jertólede ótkizip júretin. Bul óńirdiń, ásirese, voleıbol oınaýdaǵy sheberligi maǵan jaqsy tanys. Endi, mine, osyndaı záýlim, keń, barlyq jaǵdaıy jasalǵan sporttyq keshende jattyǵyp, jastardy tárbıeleıtin bolasyzdar. Kúni erteń bul jerden bizdiń maqtanyshtarymyz Jaqsylyq Úshkempirovteı, janymyzda turǵan belgili sportshylar - Mereı, Máýlen men Nurbaqyt sııaqty myqty azamattar tárbıelenip shyǵady. Búgingi kúni Baqanasta, Narynqolda, Balpyq bıde osyndaı keshender iske qosýǵa daıyn tur. Eskeldi aýdanynda ashylyp otyrǵan bul nysan - oblysta salynǵan 10-shy sporttyq keshen, dedi ol.
Qarabulaqtyqtar atynan ardager sportshy Manat Raqymshalov sóz alyp, búgin aýdan sportshylary úshin úlken múmkindik jasalyp otyrǵanyn atap ótip, el basshylaryna shynaıy rızashylyǵyn bildirdi. Munan soń keshendi turǵyzǵan «Qurylys TBS» merdiger kompanııasynyń basshysy Batyrhan Toqtaev nysannyń sımvolıkalyq kiltin keshen basshylyǵyna tapsyrdy. Aýdandyq ardagerler keńesiniń tóraǵasy Bımurat Kópbaıulynyń aq batasynan keıin keshenniń lentasy qıylyp, shashý shashyldy.
Kópshilik sport kesheniniń ishin aralap, jattyǵý zaldarynda boldy. Oblys ákimi Amandyq Batalov boks, kúres, trenajerlyq zaldarǵa kirip, sportty serik etken balalarmen tildesti, olarǵa boks qolǵaptary, kúreske arnalǵan sporttyq kıimder úlestirildi. Ardager sporshylar voleıboldan joldastyq kezdesý ótkizip, oıyn kórigin qyzdyrdy.
Jalpy Qarabulaqtaǵy bul keshen «Aýyl – el besigi» baǵdarlamasy boıynsha salyndy. Onyń qurylysyna jergilikti bıýdjet esebinen 1,3 mlrd. teńge jumsalǵan. Munda barlyq qajetti sporttyq zamanaýı quraldar bar. Jekpe jek jáne kúsh qoldanylatyn sport túrlerine arnalǵan bul ámbebap dene shynyqtyrý-saýyqtyrý kesheninde bokspen, kúrespen, dzıýdomen, taekvondomen, aýyr atletıkamen fýtbolmen jáne voleıbolmen aınalysýǵa barlyq múmkindik jasalǵan.
Keshenniń qurylysyna negizinen jergilikti jumysshylar tartylǵan. Solardyń biri Murat Nusqabaev.
- Sport kesheniniń qurylysyn júrgizýge jergilikti qurylysshylar bastan aıaq qatystyq. Qurylysta negizinen Qarabulaq, Eshkiólmes, Abaı aýyldarynyń jigitteri jumys istedi. Keshendi barynsha sapaly saldyq dep oılaımyn. Endi munda ózimizdiń balalarymyz, nemerelerimiz kelip sportpen shuǵyldanady, dedi ol.
Búgingi kúni oblysta 10 DSO iske qosylsa, osyndaı taǵy 7 nysannyń qurylysy aıaqtalýǵa jaqyn, sonyń 1-i - Taldyqorǵandaǵy teńdesi joq Olımpıadalyq standartqa saı «Taldyqorǵan» ortalyq basseıni.
Atap ótsek, Almaty oblysynda 2020 jyly dene shynyqtyrý men sport salasyn damytýǵa jergilikti bıýdjetten 1,5 mlrd. teńge bólingen. Bul sport mektepteriniń materıaldyq-tehnıkalyq bazasy nyǵaıtýǵa, sporttyq nysandardy jaraqtandyrýǵa jumsaldy.
