«Búkil álemdegideı Qazaqstan úshin de ótip bara jatqan jyl óte aýyr boldy. Degenmen, aýqymdy qıyndyqtar men syrtqy jaıttardyń qysymyna qaramastan, bılik oqıǵa damýyna, teris qoıylymdarynyń júzege asýyna jol bermedi. Is júzinde jyl boıy daǵdarysqa qarsy shtab retinde barlyq memlekettik organdar – Prezıdent Ákimshiligi, Úkimet, ákimdikter tótenshe jaǵdaı rejiminde jumys istedi. Pandemııa kóptegen josparǵa túzetý jasaǵanymen, ol memlekettiń jalpy kúntártibin túbegeıli ózgerte alǵan joq», dep jazdy Erlan Karın.
Erlan Karınniń aıtýynsha, búginde bılik málimdegen reformalar baǵdary júzege asyp keledi. Saıası reformalardyń alǵashqy toptamasy júıelenip, sonyń aıasynda beıbit jınalystar týraly jańa zań da qabyldandy.
«Zań birden óziniń ómirsheńdigin kórsetti. Saılaý, partııalar jáne Parlament týraly zańnamalarǵa da ózgertýler engizildi. Jańa normalar da is júzinde júzege asyryp jatyr. Táýelsizdik kúni qarsańynda Prezıdent kelesi jyldyń basynda-aq saıası reformalardyń kezekti toptamasy qabyldanatynyn jarııalady. Bul reformalarǵa baǵdar saqtalatynyn jáne ári qaraı jalǵasatynyn bildiredi», dedi ol.
Budan bólek, Prezıdent kómekshisi ótip bara jatqan jylda qoǵamdyq-saıası alańdaǵy ózgerister jalǵasyn taýyp kele jatqanyn eske saldy. Sonymen birge qoǵamda túrli belsendi azamattyq toptar paıda bolyp, saıası partııalarda da býyn almasýymen qatar, jańa tulǵalar boı kórsete bastaǵanyn tilge tıek etti.
«Sondyqtan da pandemııa syndy qýatty stress-testpen betpe-bet kelgen Qazaqstannyń koronadaǵdarystyń teris áserin tómendete alǵany jáne óziniń damý kúntártibin júzege asyrýyn jalǵastyrýy jyldyń jalpy qorytyndysy sanalady», dep túıindedi Erlan Karın.
