Búgin, 8 jeltoqsan kúni Astanadadaǵy Kongress-holl saraıynda Táýelsizdik kúni qurmetine dástúrli «Jyryń bolyp tógilemin, elim» atty respýblıkalyq aıtys bolyp ótti. Bul týraly Egemen.kz tilshisi habarlady.
Jyl saıynǵy dástúrli aıtys Mádenıet jáne aqparat mınıstrligi mádenıet komıtetiniń uıymdastyrýymen, «Nur Otan» halyq-demokratııalyq partııasynyń qoldaýymen ótkizildi. Aıtystyń ashylý saltanatynda sóılegen sózinde «Nur Otan» HDP Tóraǵasynyń birinshi orynbasary Baýyrjan Baıbekov: «Partııa doktrınasynda ulttyq qundylyqtarǵa basymdylyq berilgen, biz aıtysty da árdaıym qoldap otyramyz», - dedi.
Bul jolǵy jyr saıysyna elimizdegi qazirgi tańdaǵy eń tańdaýly 10 aqyn qatysty. Ol eki kezeńnen turdy. Ekinshi kezeńge 4 aqyn shyqty. Olardyń sóz qaǵysýlary «Qulmambet aıtys» dep ataldy. Onyń erejesine saı osy tórttik bir-birimen qatar otyryp aıtysty. Nátıjesinde bas báıge Jandarbek Bulǵaqovqa berildi. Onyń júldesi – kóshpeli «Altyn dombyra» men 3 mln. teńge aqsha. Olardy aqynǵa Mádenıet jáne aqparat mınıstrligi mádenıet komıtetiniń tóraǵasy Tóleýǵalı Qyshqashbaev tapsyrdy. Birinshi oryn Dıdar Qamıevke buıyrdy. Oǵan 2 mln. teńge syıaqy tabys etildi. Júlde kólemi 1 mln. teńge bolatyn ekinshi orynǵa Nurmat Mansurov kóterildii. Úshinshi orynǵa taban tiregen Balǵynbek Imashevqa 750 myń teńgelik júldege qol jetkizdi.
Syıaqylardan aıtysqa qatysqan basqa aqyndar da qur qalǵan joq. Osy altylyqtaǵy árbir aıtysker 500 myń teńgeden qoshemet qarjysyna qol jetkizdi. Bul keshte «Qazaq aıtysy» qoǵamy jaqynda ǵana qaıtys bolǵan arqaly aqyn Esenqul Jaqypbekovtiń atymen belgilegen 100 myń teńgelik arnaıy júlde Muhtar Nııazovqa usynyldy.
Aıdar О́risbaev.
Derekkóz: egemen.kz..
