Memleket basshysy Qasym-Jomart Kemeluly Toqaevtyń: «Táýelsizdik bárinen qymbat» dep atalǵan maqalasyn oqyp shyqqanda oı on tarapqa bólindi. Ras, dáýirler almasady, dástúr jalǵasady. Ýaqyttyń synynan súrinbeı ótken urandy eldiń urpaǵynyń basyna neler kelip, neler ketpedi. Keshegi keńes zamanynda mádenıetimiz ben ádebıetimizdiń aıaǵy tusaýda, moıny buǵaýda boldy. Sovettik ıdeologııa kereǵar úgit-nasıhat tilimizdiń, tarıhymyzdyń óreli órisin, adymyn ashtyrmaı tipti tynysyn taryltyp kelgenin aǵa urpaq jaqsy biledi. Dástúr: salt-sana, ádet-ǵuryp syndy ıgi dúnıelermen birge ózi de myń ólip, myń tirilgen qazaq balasy úshin álbette el egemendigi bárinen qundy, qudiretti. Osy turǵydan alǵanda Qasymjomart Kemelulynyń: Til, tarıh, ádebıet pen mádenıet salt dástúrimizdi jańǵyrtý týraly astyn syza aıtqan oı-tolǵamdary janymyzdy qozǵap, júregimizdi terbedi.
Elimizden qut-bereke qashpasyn,-dep
Jerimizdiń shetin jaý baspasyn,-dep
Naızaǵa úki taqqan elimiz atam zamannan ana tilin tóbesine kótergen. Qylyshynan qan tamǵan Qyzyl Imperııanyń qursaýyndaǵy qazaq jerinde jetimniń kúıin keshken qaıran tilimizdiń hál-qadiri qaı zamanda da áńgimemizge az ózek bolyp kele jatqan joq. Ana tilimizdiń erteńi úshin búgin qam-qareket jasaýdyń da mán-mańyzy maqalada aıryqsha aıtylǵan. Bizdiń qarý, qalqanymyz óz tilimiz, tól ónerimiz ekenin el-jurttyń jadynda taǵy bir jańǵyrtýdan utpasaq utylmasymyz aıdan anyq.
Barshany baýyryna basqan alashtyń aǵaıyndy alalap, ala qoıdy bóle qyryqqan jeri joq. Eshkimdi keýdesinen keri ıtermegen sol qazaq-eliniń tiregi, halqynyń júregine aınalǵan perzentterge kende bolǵan emes. Endeshe ózin Qazaqstandyqpyn, - dep esepteıtin ár azamat memlekettik tildi meńgerýge mindetti.
«Táýelsizdik jyldarynda talantymen tańdaı qaqtyrǵan jas órenderdiń tutas legi ósip-jetildi. Búkil álemdi aýzyna qaratqan ǵajaıyp daryn ıeleri de bar. Olar - Qazaqstannyń mádenı kelbeti, elimizdi halyqaralyq arenada tanytyp, Táýelsizdik qundylyqtaryn jer júzine pash etetin rýhanı elshilerimiz, bizdiń aıryqsha kúshimiz. Osyndaı azamattarǵa qamqor bolý - memlekettiń mindeti». Bul «Egemen Qazaqstan» gazetine shyqqan prezıdentimiz Qasym-Jomart Toqaevtyń maqalasynan úzindi.
Budan shyǵar qorytyndy: Ana tiline degen qurmet, salt-dástúrge degen izet ulttyq qundylyǵymyz bolyp eseptelý kerek. Qazaqı tálim-tárbıe besikten bastalyp ol kúlli qazaqstandyqtarǵa memlekettik deńgeıde nasıhattalsa quba-qup.
Memleket basshysynyń ıgi bastamasy jalpyhalyqtyq sıpat alsa,-degen aq jarma tilek bar bizde. Barymyzdy baǵalaıyq. Táýelsizdikti aıalaıyq.
Otandy súıý uıysqan ultyńdy súıýden bastalatynyn umytpaıyq. Endeshe jasymyz da, jasamysymyz da biraýyz bolyp biriksek alda alar qansha asý, baǵyndyrar qansha belesimiz bar. Qonysy qutty, irgesi myqty qazaqtyń senimi bútin, birligi berik ekenin jer jahanǵa bárimiz birge dáleldeıik...
Nurǵalı NÚSIPJANULY,
Qazaqstannyń halyq ártisi, memlekettik syılyqtyń laýreaty, Jambyl atyndaǵy memlekettik fılarmonııanyń ánshisi, Qazaq kórkem óneriniń akademıgi
