Polısııa qyzmetkerleri men «Ohotzooprom» RMQK ınspektorlary júrgizgen jedel-izdestirý is-sharalarynyń nátıjesinde Jylyoı aýdanynyń turǵynynan atalyq kıik eti tabyldy.
Atalǵan fakti boıynsha 339-baptyń 1-1-bóligi (Kıikti zańsyz aýlaý, joıý, sol sııaqty zańsyz oljalanǵan kıikti nemese onyń derıvattaryn, onyń ishinde múıizderin satyp alý, saqtaý, ótkizý, ákelý, jóneltý, tasymaldaý) boıynsha sotqa deıingi tergep-tekserý júrgiziledi.
Kúdiktige qatysty qylmystyq kodekstiń jańa baby qoldanylady. Oǵan úsh jyldan bes jylǵa deıingi merzimge bas bostandyǵyn shekteý nemese múlki tárkilenip, sol merzimge bas bostandyǵynan aıyrý qaýpi tónedi.
– Kıikter – qorǵalatyn janýarlar, joıylyp bara jatqan túrler retinde Qyzyl kitapqa engizilgen. Dástúrli emes medısınada kıikterdiń múıizderin paıdalaný úshin, brakonerler kıikterdi joıýda. Kıikterdi zańsyz aýlaý faktileri sońǵy ýaqytta oblystyń ártúrli aýdandarynan kelip túsýde. Qazirgi ýaqytta kıik múıizin kóterme satyp alýmen jáne olardy alys, jaqyn shet elderge ótkizýmen aınalysatyn adamdardy anyqtaýǵa baǵyttalǵan odan ári jedel-izdestirý is-sharalary júrgizilýde, – dep atap ótti Departament bastyǵy Atyǵaı Arystanov.
Jedel aldyn alý is-sharalaryn ótkizý kezeńinde mobıldi toptar 150-den astam reıdtik is-sharalar ótkizip, tabıǵat qorǵaý zańnamasyn buzýdyń 88 faktisi anyqtaldy.
Anyqtalǵan buzýshylyqtardyń jalpy sanynan 79-y boıynsha jalpy somasy 187 515 teńgege ákimshilik aıyppul salý týraly qaýly shyǵarylyp, 118 065 teńge óndirildi, onyń ishinde:
11 balyq aýlaý jáne balyq resýrstary men basqa da sý janýarlaryn qorǵaý qaǵıdalaryn buzǵany úshin;
68-janýarlar dúnıesin paıdalaný talaptaryn jáne ań aýlaý qaǵıdalaryn buzǵany úshin ustaldy.
Kórsetilgen kezeńde maqsatty is-sharalardy júrgizý barysynda toǵyz qylmystyq is anyqtalyp, qozǵaldy, onyń ishinde:
– QR QK 337 baby boıynsha (Zańsyz ańshylyq) – bes;
– QR QK 339-baby 1-1-tarmaǵy (Kıikti zańsyz oljalaý, joıý, sol sııaqty zańsyz oljalanǵan kıikti nemese onyń derıvattaryn, onyń ishinde múıizderin satyp alý, saqtaý, ótkizý, ákelý, áketý, jóneltý, tasymaldaý) boıynsha – úsh;
– QR QK 339-baby 1-bólimi boıynsha (Sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan ósimdikter men janýarlar túrlerimen, olardyń bólikteri men derıvattarymen zańsyz júginý) – bir;
