Salanyń jeke vedomstvoǵa biriktirilýi jaqynda qabyldanǵan balyq sharýashylyǵyn damytýdyń 2030 jylǵa deıingi memlekettik baǵdarlamasyn tıimdi júzege asyrýǵa, balyq ósirý, tutyný jáne eksport kólemin josparǵa saı arttyrýǵa múmkindik beredi. Memleket basshysy 2020 jyldyń qyrkúıek aıyndaǵy Joldaýynda Qazaqstannyń balyq sharýashylyǵyndaǵy áleýeti zor ekenin eskere otyryp, ony damytýǵa asa mán berý qajettigin aıtqan.
Eske salaıyq, elimizde Aýyl sharýashylyǵy mınıstrligi quramynda bolǵan Balyq sharýashylyǵy komıteti 2014 jyly taratylǵan. Odan beri balyq resýrstaryn qorǵaý, tıimdi paıdalaný jáne kóbeıtý salasyndaǵy memlekettik saıasatty Ekologııa mınıstrliginiń Orman sharýashylyǵy jáne janýarlar álemi komıteti júrgizip keledi. Salaǵa qatysty mindetterdiń komıtet pen jergilikti atqarýshy organdardyń jáne balyq sharýashylyǵyndaǵy ózin ózi basqarý sýbektileriniń arasynda bólinýi ortalyqtandyrylǵan túrde tıimdi jumys isteýge kedergi keltiredi.
Al jumysty júıeli túrde júrgizý arqyly memlekettik baǵdarlamada kórsetilgendeı sý resýrstaryndaǵy balyq ósirý kólemin 600 myń tonnaǵa jetkizýge bolady. Balyq eksportyn 300 myń tonnaǵa deıin arttyrý jospary da bar. Ol úshin 545 jańa balyq sharýashylyǵy qurylyp, 323 sharýashylyq tolyq jobalyq qýatyna shyǵady.
Qazirgi ýaqytta jańa komıtettiń aldynda memlekettik baǵdarlamanyń júzege asýyna jol ashatyn salany memlekettik qoldaý aıasyn keńeıtý, zańnamany jetildirý, balyq jemi óndirisin jolǵa qoıý, kadrlyq qamtamasyz etý jumystaryn atqarý mindetteri tur.
