Memleket basshysy Qasym-Jomart Toqaev Qazaqstan halqy Assambleıasynyń XXVIII sessııasyna qatysyp, QHA atynan Májiliske saılanatyn depýtattarǵa daýys berdi.
Sondaı-aq Tuńǵysh Prezıdent – Elbasy Nursultan Nazarbaev daýys berý rásimine qatysty. Sodan keıin Elbasy Assambleıanyń mańyzy týraly áńgimelep berdi. Tuńǵysh Prezıdent búkilhalyqtyq saılaý ótkizilip, tutas halyq retinde eldiń bolashaǵyna daýys bergenin atap ótti.
«Bul aldaǵy besjyldyq baǵdarlamamyzdy bekitken úlken saılaý boldy. Bul saılaýda Nur Otan partııasy taǵy da úlken jeńiske jetip, halyqtyń senimine bólendi. Sondyqtan aldymyzda aýqymdy jumystar tur. Búgin Konstıtýsııamyz boıynsha Qazaqstan halqy Assambleıasynan saılanatyn 9 kandıdatqa daýys berdik. Assambleıamyz 25 jyldan beri elimizdegi etnostar men dinderdi bir-birine jaqyndastyratyn, tózimdilikke tárbıeleıtin, birlikti nasıhattaıtyn, elimizdi alǵa jeteleıtin biregeı organǵa aınalyp kele jatyr», dedi Elbasy.
Osy oraıda N.Nazarbaev basqa elder Qazaqstan tájirıbesin úırenip jatqanyn atap ótti. Sondyqtan Assambleıadan saılanǵan depýtattar eldiń birligin saqtap, qazaq halqynyń tóńireginde barlyq adamdy biriktirýge óz úlesin qosady.
Budan bólek, Senat Tóraǵasy Máýlen Áshimbaev, Májilis Tóraǵasy Nurlan Nyǵmatýlın, Úkimet basshysy Asqar Mamın, Premer-Mınıstrdiń orynbasary Eraly Toǵjanov, sondaı-aq túrli vedomstvo basshylary daýys berdi.
Qazaqstan halqy Assambleıasynyń XXVIII sessııasynyń ashylý rásiminde QHA Tóraǵasynyń orynbasary – Hatshylyq meńgerýshisi Janseıit Túımebaev sóz sóılep, jıynnyń mańyzyna toqtaldy.
«О́zderińiz biletindeı, 2007 jyly konstıtýsııalyq reforma nátıjesinde qabyldanǵan Ata zańǵa Qazaqstan halqy Assambleıasynan Parlament Májilisine 9 depýtat saılaý quqyǵy berilgen ózgerister men tolyqtyrýlar engizilgen bolatyn. Bul qadam bizdiń qoǵamnyń birligin nyǵaıtýǵa, etnostar múddelerin bildirýge, olardyń elimizdiń qoǵamdyq-saıası ómirine qatysýyn jandandyrýǵa baǵyttalǵan edi. Osy norma Birikken Ulttar Uıymynyń, Eýropadaǵy qaýipsizdik pen yntymaqtastyq uıymynyń jáne basqa da halyqaralyq uıymdardyń halyqaralyq paktiler men konvensııalary aıasynda Qazaqstannyń adam qundylyqtary, azamattyq jáne saıası quqyqtar jónindegi halyqaralyq mindettemelerin oryndaý údesine jatady», dedi J.Túımebaev.
Osy oraıda ol búgin Parlament Májilisine Qazaqstan halqy Assambleıasy saılaıtyn depýtattar anyqtalatynyn atap ótti.
«Assambleıanyń 9 depýtaty Qazaqstannyń barlyq etnostarynyń, búkil halyqtyń múddesin bildiredi. QHA-nyń depýtattyq toby eldiń tatýlyǵy men birligin nyǵaıtý máseleleri boıynsha partııaaralyq yntymaqtastyqtyń parlamenttik tetigi rólin atqarady. «Saılaý týraly» Konstıtýsııalyq zańǵa sáıkes, Assambleıa saılaıtyn Parlament Májilisiniń depýtattyǵyna kandıdattar usyný Assambleıa Keńesiniń ókilettigine jatady. 2020 jylǵy 11 jeltoqsanda Assambleıa Keńesiniń otyrysynda Parlament Májilisiniń depýtattyǵyna Qazaqstan halqy Assambleıasy saılaıtyn kandıdattar usynyldy», dedi J.Túımebaev.
Onyń aıtýynsha, Assambleıa Keńesi kandıdattar tizimin jasaý barysynda birqatar mańyzdy krıterıılerdi eskerdi. Atap aıtqanda, depýtattyq korpýstyń sabaqtastyǵy, aımaqtyq qamtý, genderlik teńdiktiń qamtylýy, jastardy tartý, etnıkalyq toptardyń eskerilýi, depýtattyq korpýsta eki merzimnen artyq saılanbaýyna mańyz berilgen. Keńes qaraýynyń qorytyndysy boıynsha Parlament Májilisine depýtattyqqa Assambleıa saılaıtyn kandıdattar usyný týraly sheshim qabyldanyp, olar saılaý bıýlletenine engizildi.
Qazaqstan halqy Assambleıasynan usynylǵan Parlament Májilisi depýtatyna kandıdattardy saılaý aıaqtalǵan soń, Nur-Sultan qalalyq saılaý komıssııasy daýys berý nátıjesin jarııalady.
Daýys berýge qatysqan QHA músheleriniń jalpy sany – 351 adam. Májilis depýtattyǵyna kandıdattar úshin berilgen bıýlletender: Saýytbek Abdrahmanov – 298, Avetık Amırhanıan – 270, Ilıas Býlarov – 274, Natalıa Dementeva – 292, Iýrıı Lı – 282, Vakıl Nabıev – 285, Shamıl Osın – 271, Vladımır Tohtasýnov – 277, Abılfas Hamedov 290 daýysqa ıe boldy.
Daýys berý nátıjesinde QHA-nyń 9 kandıdaty Parlament Májilisine ótti. Qazaqstan halqy Assambleıasynan saılanatyn Parlament Májilisi depýtattaryn saılaý qorytyndylaryn Ortalyq saılaý komıssııasy shyǵarady.
