Batys Qazaqstan oblysyndaǵy sý tapshylyǵy qashan retke keledi?

Aımaqtar • 28 Qańtar, 2021

Batys Qazaqstan oblysyndaǵy sý tapshylyǵy qashan retke keledi?

Senator Narıman Tóreǵalıev elimizdiń Premer-Mınıstrine joldaǵan depýtattyq saýalynda Batys Qazaqstan oblysynyń ońtústigindegi 4 aýdanynyń, onyń ishinde Bókeı ordasy, Jánibek, Kaztalov, Jańaqala aýdandarynyń 80 myńnan astam turǵyny tap bolyp otyrǵan ózekti máseleni kóterdi, dep habarlaıdy Egemen.kz

Aıym DÁÝIT

Qazirgi ýaqytta aımaqta sýmen jabdyqtaý máselesi asa mańyzdy bolyp otyr. Bul aımaq negizinen mal sharýashylyǵymen aınalysady jáne Reseıden sý alyp otyr.

Búgingi tańda Edil ózeninen Reseıdiń Saratov, Volgograd oblystary arqyly oblystyń ońtústik aımaqtaryna Úlken jáne Kishi ózenderine aǵyp keletin sý mólsheri aıtarlyqtaı azaıdy. Sonymen qatar, jyl saıyn sý alý shyǵyndary ósip keledi.

Qazirgi kezde Saratov kanalynan 54 mıllıon tekshe metr sý, Volgograd oblysynan taǵy 28 mıllıon tekshe metr sý keledi. Batys qazaqstandyqtardyń naqty muqtajdaryna qosymsha 131 mln tekshe metr sý qajet. Sonymen qatar 1 tekshe metr sýdy jetkizý quny ortasha eseppen 4,6 rýbldi quraıdy.

«Eki ózenniń boıynda ornalasqan shaǵyn sý qoımalarynyń syıymdylyǵy 211 mln m3 quraıdy. Biraq qazir bul sý qoımalary bos tur deýge bolady. Ol óz kezeginde, sýdyń joıylýyna, mıneraldanýyna, lastanýyna jáne balyqtar men maldardyń eriksiz qyrylýyna ákep soǵýda. Sý máselesiniń kúrdeliligi sonshalyq, sharýa qojalyqtary jem-shóp daıyndaý úshin qajetti jaıylmalarǵa jiberiletin sýdy shekteýge májbúr bolyp otyr. Olar endigi kezde mal sýarýǵa sý jetse soǵan qýanatyn boldy», deıdi Narıman Tóreǵalıev.

Oblys aldynda turǵan negizgi mindetterdiń biri mal basyn kóbeıtý, ony óńdeý jáne eksporttaý bolyp tabylady. Sý tapshylyǵy bul maqsatty júzege asyrýǵa aıtarlyqtaı kedergi keltirip keledi.

«Sońǵy jyldary sharýa qojalyqtary memlekettik baǵdarlamalardyń kómegimen shetelden asyl tuqymdy mal satyp alýda. Biraq qazirgi problemalardyń kesirinen barlyq maldan aıyrylyp qalý qaýpi bar», deıdi senator.

Narıman Tóreǵalıev qarjylandyrý máselesin de qozǵady. Depýtattyń aıtýynsha, ótken jyly 2021-2023 jyldarǵa arnalǵan respýblıkalyq bıýdjetti bekitý kezinde batys óńiriniń turǵyndaryna sý jetkizý shyǵyndaryn óteý máselesi qoldaý tappady.

«Oblystaǵy bul ózekti másele mal sharýashylyǵymen aınalysýda qıyndyq týdyryp qana qoımaı, sonymen qatar Memleket basshysynyń balyq sharýashylyǵyn damytý jónindegi tapsyrmasyn oryndaýǵa teris áser etedi», dedi depýtat.

Senator óz saýalynda Úkimet basshysynan bıylǵy jyldyń aqpan-naýryz aılarynda bıýdjetti naqtylaý kezinde 131 mln m3 kóleminde sý jetkizý jónindegi shyǵystarǵa qosymsha 3,5 mlrd teńge bólýdi surady. Bul Batys Qazaqstan oblysynda mal sharýashylyǵyn damytýǵa múmkindik beretin qarjy kólemi.