Qalalyq Polısııa basqarmasynyń bastyǵy Andreı Mýla erlik tanytqan Artemge óz rızashylyǵyn bildirip, gramota men estelik syılyq tabystady.
«Batyldyǵyń men berik ustanymyń maqtaýǵa turarlyq. Keleshekte seni polısııa qatarynan kórgimiz keledi», dedi óz sózinde A.Mýla.
Al Artem «Búrkit» arnaıy jasaǵynda qyzmet etkisi keletindigin jetkizdi. Balalar úıinde tárbıelengen ol búginde bir shańyraqtyń ıesi. Bos ýaqytynda sportpen aınalysqandy unatady. Ásirese boksqa degen qyzyǵýshylyǵy joǵary.
«Sýǵa batyp bara jatqan áıeldi kórgende qarap tura almadym. Bar oıym – ony tezirek qutqarý boldy. Meniń ornymda kez kelgen adam solaı ister edi. Shynymdy aıtsam, sol úshin Polısııa basqarmasynyń bastyǵynan marapat alamyn dep esh oılamappyn», dedi jigit.
Esterińizge sala ketsek, keshe 1960 jyly týǵan qala turǵyny ózennen sý alyp jatqanda taıyp ketken. О́zenge qulap, 100 metrdeı aqqan ol butaqtan ustap qalyp, kómekke shaqyrdy.
«Sol mańaıdan ótip bara jatqan Artem men onyń jubaıy Vera janushyra aıqaılaǵan daýysty estigen. Áıeldiń ary qaraı aǵyp ketýge shaq qalyp turǵanyn kórgen 20 jastaǵy jigit esh oılanbastan ózenge sekirdi. Júzip jetkenmen ony jaǵaǵa shyǵara almady. Biraq sonda da áıel adamnyń kúrtesinen ustap, jan-jaǵyna aıqaılap kómek surady. Birneshe mınýttan keıin polıseıler men qutqarýshylar kelip, olardy sýdan shyǵaryp aldy», delingen О́skemen qalalyq Polısııa basqarmasy taratqan aqparatta.
