Sábıt Orazbaev: Sahnanyń kelbeti – akter

– Sábıt aǵa, karantınniń kedergisi bolmasa, 85-ke kelip otyrǵan sizdi byltyrǵa deıin spektaklderden kórip, kóz­aıym bolyp júretin edik. Oqys­tan kelgen ońasha ómirge úırene aldyńyz ba, ýaqy­ty­ńyzdy qalaı ótkizip jatyrsyz, teatry­ńyzdy saǵynǵan bolar­syz?

– Búkil álemdi bir tarynyń qaýyzyna syıǵyzǵan bul indet, basqadan buryn, bizge, ásirese qart adamdarǵa qıyn soǵyp tur. «Aǵa, eshqaıda shyqpańyz, úıde otyryńyz» dep dáriger de kún saıyn telefon soǵyp, qadaǵalap otyrady. «Kóbelektiń kárisi joq, káriliktiń dárisi joq» degen maqalymdy estigen el myrs-myrs kúlip jatady. Biraq ras, jatqan saıyn qýraı túsetin qarttyq onsyz da úıden alysqa uzatpaı tusap júretin edi, oǵan karantın qosylyp, ońashada oı baqqan úıkúshikke aınalyp shyǵa keldik. Biraq demimizdi ishimizge alyp, janymyz ıneniń ushynda tursa da, osy qıyndyqtan qýanysh tabýǵa mindettimiz. О́ıtkeni erte me, kesh pe, bul kún de ótedi, bastan ót­kizgen osy kezeńdi qaıtyp oralmas ómirimizden syzyp tastaı almaımyz, sol úshin bul munartqan belgisiz kúnderden de qýanysh pen ǵıbrat qalýy kerek. Bar sanaly ómirimiz sahnada ótkennen keıin teatrymyzdy saǵynamyz, árıne. Jas kúngideı jasyn bolyp jarqyldaǵan oıyn úlgisin kórsetpesek te, eski daǵdymen jaı ǵana aıańdap, kúnine bir mezgil teatrǵa baryp, úlken-kishimen qaýqyldasyp qaıtýdyń ózi merekemen para-par edi. Amal ne, endigi jerde el qatarly tártip pen erejege baǵynýymyz – mindet.

– Jyldaǵy dástúrmen mara­pattalǵandar qatarynda I dá­rejeli «Barys» ordenin al­dy­ńyz, qutty bolsyn! Ataq pen dańq­­qa baılanysty túıgen ǵıb­­ra­tyńyzben de bólise otyr­sańyz.

– Maqtalý, marapattalý ja­ǵynan kemshin qalǵan jerim joq. Eńbegimniń nátıjesi dál ýaqytynda atalyp, der kezinde baǵalanyp keledi. Buǵan deıin  «Otan» ordenin alǵan edim. Jalpy, orden-medal, syı-sııapatqa jurttyń pikiri birkelki emes ekenin baıqadym. Estigen týys-tanystyń bári quttyqtap jatady. «Sonyń sizge ne keregi bar? Bas tartyńyz ordennen» degender de boldy. Surap alǵam joq, bireýdi sorlatyp alǵam joq, eńbegim baǵalanyp, qurmet kór­setilip jatsa, nege bas tartýym kerek? Buıyrǵan baqty adam basqa tebe me? Olaı etsem, adamǵa jaraspaıtyn astamshylyq bolar bul.

– Ataq týraly áńgime qoz­ǵalyp ketti ǵoı, keıingi jyldary ataq pen marapattyń shúlen taratqandaı ońdy-soldy taratylýy qoǵamnyń narazylyǵyn týdyryp otyr. Siz uzaq jyldar Memlekettik syılyqty berý jó­nindegi komıssııa múshesi bol­dyńyz, «naǵyz spektakldi son­da kórdim» degen edińiz. Bú­gin­gi ataq berý prosesi durys pa?

– Ataq týraly uǵym ártúrli bolady. Ataqqa da, basqaǵa da bas aýyrtpaıtyn jastaý kúnimizde «Muhtar Áýezov teatrynyń ak­teri jasaǵan obraz» degen bir aýyz sóz búgingi kez kelgen ataq­tan bıik turatyn edi. Serke Qo­jamqulov, Qapan Badyrov, Elýbaı О́mirzaqov, Qalıbek Qýanyshbaevtarmen bir teatrda jumys isteımin degen oıdyń ózi anaý-mynaý marapatyńdy jolda qaldyratyn. «Toı da óter, dýman da óter, qyzyq ta óter, arqyrap aǵar ýaqyt sýdan beter. Qulpyrǵan qý dúnıeniń qyr sońynan, Qus salyp, quryq salyp qýý beker»» deıdi babalarymyz. Dúnıeni bostan bosqa qýý emes, eńbek etip, tabys taýyp qýý kerek. Seniń eńbegińniń jemisin aınalań kórip, júregińnen shyq­qan nur men shapaǵatty tóńiregiń, kórermen sezinip, sodan lázzat alýy kerek. Qaı jerge barsań da «orta talanttar nege laýreat bolady, nege ataq alyp ketedi?» de­gen suraq kóp áńgime bolady. Burynyraqta bolashaq ataq ıesi adal eńbegi men qajyr-qaı­ratynyń arqasynda tanylyp, aldymenen qoǵamdaǵy ornyn belgilep, óziniń belgili bir sa­tysyna shyǵyp alatyn. So­dan keıingi «Halyq ártisi» degen saty shyń sııaqty kóri­netin. «Aldamshy úmit jeteler, sezdirmegen salmaǵyn. Árkim ózi kóterer, Táńirdiń bas­qa salǵanyn» degendeı, etken eńbeginiń jemisi birtindep alǵa jetelep, ol ómiriniń biraz jerine deıin jetetin. Al qazir saty-satysymen ósip-jetilý degen umyt qalyp, janyn salyp eńbek etýge qalyptaspaǵan jas balalar birden bastan asyp sekirýdi, turǵan jerinen jolyndaǵysyn qaǵa-maǵa qarǵýdy daǵdy etip aldy. Qazir ártisterde «Qa­zaq­stannyń eńbek sińirgen qaıratkeri» degen jalǵyz ataq bar. Jantalasyp júrip sol ataqqa qoly jetkender keshegi eńbekti de, izdenisti de umytyp, jalpaıady da qalady. «Sharshap» qalady. Asylynda, kerisinshe bolýy kerek emes pe edi. Ataqtyń salmaǵyn sezinip, burynǵydan eki ese mańdaı terin monshaqtatyp, izdenisin ústemeleı túsýi kerek edi. Joq. Tobyrǵa aınaldyq. To­byr degen kókjıekten arǵy­ny kórmeıdi, biraq minberdi ber­meıdi. Al Memlekettik syı­lyq týraly aıtyp aýzymdy aýyrtqym kelmeıdi. Ákesi – ataq, sheshesi – mansap sekildi, sol úshin neden bolsa da taıynbaıtyn jankesh­tilerdiń araǵa nebir kókeleri men aǵalaryn salyp, mezi etkeninen sharshaǵanym sondaı, qolymdy bir siltep komıssııa músheliginen baıaǵyda shyǵyp ketkenmin.

– О́zińiz qyzmet etip kele jatqan M.Áýezov atyndaǵy dra­ma teatry «ulttyq» degen mártebege ıe bolyp, búkil ujy­­myńyz máre-sáre bolyp qýa­nyp jatyr. 95 jyldyq tarıhy bar teatrǵa alǵash ju­mys­qa qabyldanǵanyńyzda, teatr­ǵa qansha jyl tolǵan edi?

– Men ónerdiń qarashańy­ra­ǵyna jumysqa kelgenimde teatr 34 jyldyǵyn toılap jatty. Mine, sodan beri alpys jyldan asty. Teatrymyz ult rýhanııatynyń uıytqysy bolǵan qyzmetinen aınyǵan emes. Korıfeılerdiń kózin kórdik, amanatyn arqalap kelemiz. Zamanyna saı ol ýa­qyt­taǵy mereıtoıdyń máni de, mazmuny da bólek bolatyn. Teatr­dyń týǵan kúni eldiń mádenı ómirindegi eleýli oqıǵa retinde atalyp ótip, jyl saıyn jıyn shaqyrylyp, resmı baıandamalar jasalatyn. Orden-medaldar tabystalyp, sypyra maqtalatyn. Báriniń kózi tiri, jaısańy mol jaqsy ýaqyt edi ǵoı ol.

– Keńestik respýblıka­lardyń ádebıeti men mádenıe­tindegi myqtylar bir-birimen ajyramas dosqa aınalýdy dás­túr etip, ol dostyqtyń ber­tinge deıin jalǵasqanyn bile­miz. Siz de «Qan men terdegi» Súıeýdiń rólimen Innokentıı Smok­týnovskıı sııaqty álemge áı­gili sahna óneri áýlıesiniń naza­ryna erte iliktińiz. Sol ta­nys­tyqty dostyqqa aınaldyryp jiberýge talpynbadyńyz ba?

– Súıeýdiń róli Elaǵańa – Elý­baı О́mirzaqovqa arnalyp, ol kisi aıaqasty aýyryp qalǵan soń, assıs­tent bolyp júrgen maǵan amalsyz berilgen ról edi ǵoı. Elaǵań kele almaı repetısııa shegerile bergen soń teatrǵa jıi keletin Ǵazıza Ahmetqyzy kúıeýine: «sen osy Súıeýdiń róline anaý Sábıt degen balany salyp kórmeısiń be?» degen eken. Ázekeń oılanyp qalady. О́ıtkeni Ǵazıza apa­myz dana adam edi, Ázekeń ol kisiniń aıtqanyna qulaq asatyn. Mámbetov ol kezde meni syrttaı tanyǵanymen, atymdy da bilmeıtin. Meniń buǵan deıingi oınaǵan rólderimdi kórgen, kó­ńilinen shyqsam kerek, «áı, bala, beri kel» dep birde sahnanyń qaptalyndaǵy bólmege shaqyryp aldy. Súıeýdiń rólin usyndy, estigen boıda, shoshynǵanym son­sha, kózderim baǵjań etip, keıin qaraı serpildim. «Jo-o-oq, ata­mańyz!» Bir kúni túngi saǵat úshte Ázekeń telefon shalady: «Áı, ıdıot, ne istep jatyrsyń?» «Uıyqtap jatyrmyn». «Idıot, myna spektakl qulaǵaly tur, al sen uıyqtap jatyrsyń. Adam emessińder, adamǵa jany ashý degen bolmaıdy ǵoı senderde» dep meniń bas tartatynymdy bilip, aldyn ala soqqynyń ústine soqqy beretin boksshy sııaqty tilge keltirmeı tópelep jatyr meni. Bas kótertpeı tópelep-tópelep alyp: «Erteń toǵyzdan keshikpeı kel, grımge otyrasyń» dedi. Bitti. Súıeýdiń beınesi janyma, súıegime deıin sińgeni sondaı, az ýaqytta shal sııaqty qartaıyp, júdep kettim. Odan keıingi áńgimeniń bári jurtqa aıan. Spektakldiń ataǵy jer jar­dy. Orystyń uly akteri Inno­kentıı Smoktýnovskıı Más­keýge gastroldik saparmen barǵanymyzda «Qan men terdi» kórip, Súıeý róline jo­ǵary baǵasyn berdi. Qazaq ónerin buryn-sońdy moıyndap kórmegen belgili sahna sheberiniń men týraly aıtqany birden Odaq kólemine taraıtyn basylymnyń bárinde jarııalanyp, bir-aq mezette ataǵym dúrkirep shyǵa keldim. Spek­takl aıaqtalǵan soń «Gde moı kazahskıı stepnoı starık?» dep Smoktýnovkıı sahna syrtyna bizdi izdep keldi. Meni kórdi de: «Men oılaǵannan áldeqaıda jas eken» dedi. Janynda turǵan Ázekeń: «Meniń akterlerim jas­ty da, kárini de oınaı beredi» dep maqtanyp qoıady. Men orystyń birde-bir akterimen jaqyn tanysqan emespin. О́ıtkeni orystyń ataqty kıno jáne teatr akterleriniń kópshiligi araq pen temekige úıir keledi. Al Smok­týnovskıı men sııaqty ishimdik te ishpeıtin, temeki de shekpeıtin adam eken.

– Bir teatrda taban aýdarmaı alpys jyldan asa jumys isteısiz, sonaý jas kúninen horda ánshi bolǵan úıdegi Sáýle apamyzben de bir shańyraq astynda osynsha jyl birge otasyp kelesizder. Qoǵamdaǵy otbasy qun­dylyǵynyń quldyrap, adal­dyqtyń, turaqtylyqtyń quny tym-tym qymbatqa túsip bara jatqany sizdi de qamyq­tyratyn bolar?

– Naryqqa beıimdelgen za­mannyń zańy qatal. Qoǵamdaǵy bul qa­taldyq asqyna kele adam­nyń bolmysyn, minezin, tirshiligin ózgertpeı qoımaıdy. Az jyldyń ishinde biz adam tanymastaı ózgerip kettik. Tegin bilim alyp, tegin emdelý degendi aıtpaǵanda, qol ushyn sozý, aýyl balasynyń júgirip baryp bireýge kómektese salý deıtin janashyrlyq, kisilik qasıetteri boıdan alystap barady. Jap-jas balalar qıyndyqqa shydamaı, ózine ózi qol salyp, qyrshynynan qıylyp jatyr. Ashtyqty da, soǵysty da kórgen bul qazaq bir ezýinen bal, bir ezýi­nen maı aǵyp otyrǵan mamyrajaı zamanda qolyna arqan alyp asyla salatyndaı janynan munsha nege bezindi? Aınalanyń bári aldaý, arbaý. Ol úshin namystanyp jatqan adamdy kórmeısiń, aıaǵy aspannan kelip aıaqasty sorlap jatqandardy kórip turyp, basqalary aıylyn jımaq túgili, urlyǵy men qylmysyn tyıatyn emes. «Zaman solaı» dep qa­shan­­ǵy zamanǵa qaraı aýdara salyp, kinásiz adamnyń keıpin jasap qarap otyramyz? «Kóppen kórgen uly toı» dep ózimizdi jubat­qanymyzben, keri ketken qıyn kezeńge kezdestik. Qudaı aqyryn bersin deımiz, basqa ne shara?

– Aǵa, osy sahna men saıa­sattyń, teatr men bıliktiń arasy qandaı bolýy kerek?

– Sahna – óner alańy ǵana emes, halyqtyń betperdesi, mine­zi, tarıhy. Teatrsyz el – máde­nıeti tómen el.

Teatr qoǵamnyń ózekti máse­lesin ekshep alyp, kemshiligin, qaıshylyǵyn kórsetip, spektakl etip qoıa alsa, soǵan halyq pen bıliktiń nazaryn aýdara alsa, óz mindetin oryndaǵany. Jeke akterdiń sanyn sabalap, attandap shy­ǵýy mindet emes. Aıǵaılap shyǵý ba­tyrlyqqa jatpaıdy. Azamattyq kózqarasyn ónerimen kórsetsin. Bul úshin teatrdyń repertýar saıasaty qoǵamnyń júgin kóte­retin máselelerge baılanys­ty qurylýy kerek. Sahna men saıasat­tyń arasynyń qandaı ekeni sonda kórinedi. Al jalpy shyndyqty sahnadan aıtý qaı kezde de ońaı bolmaǵan. Kólgirsigen ótirik aıtylyp jatqan jerde shydaı almaı, qynynan almas qylyshyn sýyryp alyp, tilip turyp aıtatyn júreginiń túgi bar jigitter de boldy, biraq keıinnen jumysynan aırylyp qaldy. Baıaǵyda Nurmuhan Jantórınder jumystan sóıtip ketip qalǵan. Minezi qıyn edi ǵoı jaryqtyqtyń, on jyldan artyq ókpelep júrip, Raıymbek Seıitmetov dırektor bolǵanda teatrǵa qaıta oraldy. Raıymbek Máskeýden Majýrın degen rejıs­serdi arnaıy shaqyryp, Jantórınge arnap «Jendetter» degen spektakl qoıdy. Keremet spektakl boldy. Kórermenmen qaıta qaýyshqany Nurmuhannyń janaryna jas ákeldi. Bul spektaklde jeke tulǵalardyń qorlyq kórýi, bıliktiń olardyń únin shyǵarmaı, tabanynyń astyna basyp-janyshtaýy sóz bolatyn edi. Naǵyz Nurmuhannyń ómirine uqsas, óz taǵdyryna sáıkes keledi. Sodan da bolar, ol jasaǵan beıne kórermendi tebirentip, eńiretip jiberdi. Amal ne, jańa kelgen dırektormen juldyzy qarsy bolyp, Nurmuhan taǵy da teatrdan ketýge májbúr boldy jáne sol ketkennen qaıta oralmady. Al ol oınaǵan «Jendetter» «saıasatqa qaıshy keledi» degen jeleýmen repertýardan múlde alynyp tas­taldy...

– Siz sahnadaǵy seriktes­terińiz týraly kóp jazdyńyz, «Ta­zarǵyń kelse, teatrǵa bar», «О́mirdiń ózi – teatr» at­ty eki birdeı kitabyńyzdy oqyr­man jyly qabyldady. «Sah­nadaǵy jaqsy seriktes» dep siz kimderdi atar edińiz?

– Bul suraqqa keńinen tol­ǵanyp jaýap bergim keledi-aq, biraq bir qıyn jeri bar. О́ner adamy, onyń ishinde teatr ártisi bala sııaqty, bir aýyz jaqsy sózge jany semiredi, negizsiz qaralaǵan qııas sózge ózegi órtenip, jaralanyp qalady. Sol sebepti bireýin aıtyp, bireýin atamaı ketseń, burtańdap renjıdi. Biraq kásibı turǵyda óssem, talantym jarqyrap kórinip, azǵantaı abyroıǵa bólensem, sahnadaǵy sol seriktesterimniń arqasy dep oılaımyn. О́ziń qansha jerden janyńdy salyp oınaǵanyńmen, sahnadaǵy seriktesiń álsiz bolsa, eńbegińniń bári dalaǵa ketedi. Akterlik ómirimde sahnada serik­tes bolǵan áriptesterim jetedi, qaısybirin aıtaıyn. Solardyń árqaısysy bir beıneni ár sahnaǵa shyǵarǵanda alýan qyrynan damytyp, kórermendi ózine tartyp otyratyn. Akter de, spektakl de bir ǵana kórinispen kórer­menniń esinde qalady. Eki seriktes bir-birine laıyqty bolsa ǵana, spektakldiń máni, ajary ashylady. Bizdi asyraǵan da, ósirgen de osy óner ǵoı.

– Jaqynda teatrdy mereıtoıymen quttyqtaýǵa kelgen Mádenıet jáne sport mınıstri A. Raıymqulova aldaǵy jyly ákemteatrda kúrdeli jóndeý júr­­gizilýi múmkin ekenin, teatr­dyń jobasyn jasaýǵa qa­tys­qan, qurylystyń basy-qasynda bolǵan máskeýlik eki ar­hıtektordyń biriniń áli kúnge Máskeýde turatynyn, ja­qynda ǵana onymen telefon arqyly sóıleskenin aıtty. Reseı arhıtektory jóndeý júr­gizgende óte abaı bolý ke­regin, sebebi teatr ǵımaraty bire­geı arhıtektýralyq nysandar qataryna jatatynyn eskertipti. Aıtpaǵym, M.Áýezov atyndaǵy teatrdyń ashylý saltanatyna sol kezdegi KOKP Bas hatshysy Leonıd Brejnevtiń ózi kelip qatysqan kórinedi, sol oqıǵa esińizde me?

– Esimde bolǵanda qandaı! О́z ýaqytynda tarıhı oqıǵa retinde qabyldanǵan teatrymyzdyń paıdalanýǵa berilgenine kelesi jyly buıyrsa, 40 jyl bolady. Biz jańa ǵımaratqa 1982 jyly kóship bardyq. Brejnev ashylý saltanatyna emes, sál keıinirek keldi. Ǵımarat jobasy jańashyldyǵymen, erekshe sáýletkerlik sheberligimen úzdik dep tanylyp, joba avtor­laryna Qazaqstannyń Mem­le­kettik syılyǵy berildi. Ákem­teatrdyń jańa úıin kórýge Leo­nıd Ilıchtiń ózi keletin boldy. Bul degen sol kezde úlken qurmet bolatyn. Daıyndyq barynsha tyńǵylyqty ári qatań tártippen júrgizildi.

Sodan ne kerek, gensek te keldi-aý. Ǵımaratty aralap kórdi. Árıne, Dımekeńniń ózi bas­tap alyp júrdi. Biz bólmemizden shyqpaı otyrdyq. Aralap bolǵan soń jınalysqa shaqyrdy. Tórde otyrǵan gensektiń ájethanaǵa shyq­qysy keldi me, ornynan turyp, sahna syrtyna bettedi. Qasynda, árıne, nókeri bar. Qyrsyq shalamyn dese, aıaqasty ǵoı. Dál sol sátte teatr dırek­torynyń sharýashylyq isteri jónindegi orynbasary Govarıýk te ájethana mańaıynda júrse kerek. Odaq basshysynyń kele jatqanyn kórip, aldyn kes-kestemeı, bir qaltarysqa boıtasalap tura qalady. Gensek ketken soń qýystan shyǵa bergeninde kúzetshiler ustap alady. «Kimsiń? Ne istep júrsiń? Nege tyǵyldyń? Kim jiberdi?» «Men dırektordyń orynbasarymyn, ájethananyń ázirligin tekserdim» degenine qaramaı, ábden qınaıdy. Ne kerek, sol orynbasardy jarty jyl tekserdi-aý. Áıteýir joǵarǵy jaqtyń aralasýymen ǵana jany aman qaldy, biraq jumystan ketip tyndy. Teatr ómiri osyndaı oqıǵalarǵa da toly, sonysymen de qyzyq.

– Sizdiń maıyn tamyza aıtatyn áńgimeńizden eki qaıtara estip qalǵan Elbasymyzdyń syılyǵy týraly bir epızod ylǵı da suhbatymyzǵa ilinbeı qalyp qoıady. «Nıý-Iorktiń meri bergen» dep taǵatyn taǵy bir galstýgyńyz bar edi, aıtýly sharalarda alystan kóz tartatyn ádemi galstýkterińizdiń syryn aıtý­dyń reti kelip-aq tur búgin...

– Sonaý 90-jyldardyń bel ortasynda qazaqstandyq delegasııa quramynda AQSh-qa bardyq. Nıý-Iork qalasynyń meri qara násildi adam eken. Amerıkalyqtarǵa tanymal bo­lýynyń sebebi, óte isker adam bolǵan. Biz oǵan dombyra syı­ladyq. O, ǵalamat, qo­lyna dombyra ustap edi, ál­gi sú­­likqaram qazaqqa uqsady da qal­dy. Mine, dombyranyń qudireti. Beıtanys aspapty ary-beri tyńqyldatyp shertip otyrdy da: «do qaıda?» dedi. «Bizdiń dombyranyń aldyńǵy ishegi «re»-ge negizdelgen» dedim qarap turmaı. «Siz mýzykantsyz ba?» dedi maǵan. «Joq, ak­termin». Mer maǵan galstýk syı­­lady. Nurekeń syılaǵan taǵy bir galstýk bar. Nursultan Ábish­ulymen dostyǵymyz sonaý jas kúnimizden bastalyp, sodan beri jalǵasyp kele jatqanynan jurt habardar bolar. Ol ýaqytta Nure­keń hatshy-tuǵyn. Keıinnen táýelsizdiktiń alǵashqy jyldarynda Nurekeń delegasııa jasaq­tap Amerıkaǵa resmı saparmen bardy. Umytpasam, Djordj Býshtyń prezıdenttigi tusynda bolsa kerek. Sol saparynda Nursultan Ábishuly maǵan galstýk syılady. «Áı, Sábıt, mynaý tym sándi, tym ashyq tústi galstýk eken, muny menen góri sen taqsań jarasady, osyny sen al, jarqyrap júr» dep maǵan tartý etti. Sodan beri qansha jyl ótti, áli óńi túsken joq. Moıynǵa taǵatynym jetip arty­lady ǵoı, ne ǵajaby baryn bilmeımin, anda-munda osy galstýkpen el aldyna shyqsam, ózim jaıyma qalyp, bári galstýgymdy qyzyqtap ketedi.

– Jetpis jylǵa jýyq ómi­rińizdi ótkizip kele jatqan teatr­da akterlerdiń birneshe býy­ny almasty. Teatrda býyn­aralyq almasý úrdisi qa­laı júr­di, ol kezeń men bul ke­zeń­degi oıyn órneginen aıyr­ma­shylyq, ózgeris baıqaısyz ba?

– Baıaǵyda kórermen bizdiń teatrǵa tek Farıdany kórý úshin ǵana keletin edi. Sábıra apam men Hadısha apamdy saǵynyp keletin kórermende tipti esep bolmaıtyn. Ánýardyń Vanıasyn kórý úshin keletinder teatrdy basyp qalatyn. Bılet joq, esikti syndyryp jibere jazdap, syrtta seńdeı soǵylysyp júretin edi halyq. Vanıa qazir de oınalyp jatyr, ony oınap jatqan Azamat ta, Erkebulan da talantty balalar, biraq báribir men úshin Ánýardyń oıyn órnegi bólek. Janyma jaqyn. Qazir syn joq. Saraptaý bolmaı qaldy. Tek kópirtip maqtaı beretin boldyq. Áıteýir maqtaı bersek, qatelespeımiz deıtin bolsa kerek. Keıingi rejısserler dramatýrgııaǵa, pe­saǵa qolyn tym batyryp ji­beredi. Sheteldik rejısserler­ge kóp elikteý baıqalady. Spek­taklderde bı shamadan tys kóp qoıylady, án men jyr da orynsyz kóp. Qallekı men Ydy­rystardyń kúndeı kúrkirep tura­tyn daýysy ózderimen birge ketti, endigi jas akterler qansha kúshense de, daýysy shyqpaıdy. Sahnanyń kelbeti – akter. Drama teatrynyń akteri degen atqa laıyq bolý úshin janyńdy salyp jumys isteýge týra keledi. Olaı bolmaǵanda jeńil-jelpi shoý-dýmanda jurtty kúldirgenge máz bolyp, saıqymazaq akter bol­ǵanyńdy óziń de bilmeı qala­syń. Sóılegen sózińe nemese aıtqan ánińe shapalaq surap masqara bolasyń. Qalaı degenmen, teatrǵa jańalyq ta, ataq-abyroı da joǵarǵy deńgeıde qoıylǵan spektaklder arqyly keledi. Osyny umytpaǵanymyz abzal.

– Áńgimeńizge raqmet, aǵa!

Áńgimelesken

Aıgúl AHANBAIQYZY,

«Egemen Qazaqstan»