О́kinishke qaraı, bizde barlyq aýyl osy deńgeıge jetti me? Elimizdiń basqa óńirlerin qaıdam, Mańǵystaýda aýyldar «I love-latyp» alaýlap tur. Oblys ortalyǵy Aqtaý qalasynan bastap árbir aýdan, qıyrdaǵy shaǵyn aýyldar da aǵylshynsha ólip-óshken mahabbat qushaǵynda. Túıesin izdegen bir apaı bala-shaǵasyna qaıtyp kelip: «Myna jaıraǵyr anaý «aıladyr» degen jazýdyń arǵy jaǵyna ótip ketipti, ol jaqtan ne jeıin dep júrgenin?..» degen eken. Qarapaıym aýyl turǵyndary túsinbek túgili tili de kelmeıtin tirkesti túgelge jýyq aýyldarda áspettep tasqa qondyrý qanshalyqty qajet jáne kimge qajet? Osy ınstallıasııa rasynda aýyl sánin arttyryp, jastardyń kóńilin kótere me? Aýyldar ajar jaǵynan bir-birimen básekelestikte bolyp, ózgede joq nárseni jasaýmen ǵana erekshelene alady. Al bir jazýdy ınkýbatordan shyqqandaı kóbeıtip, kez kelgen aýylǵa aparyp ornata berýdiń eshqandaı maǵynasy joq sekildi. Álde aǵylshynsha jazý aýylda «menmundalap» aıqaılap tursa, damýdyń, joǵary órkenıettiliktiń belgisi me? Álde bul «Úsh tuǵyrly» til bastamasyna ún qosýdyń, «tildi úırenýdemiz» degenniń ısharasy ma? Olaı deýge aǵylshynsha túgili, qazaq tilinde qatesiz jaza almaıtyn aýyl oqýshy balalarynyń saýaty kedergi. Múmkin, daraqylyq, talǵamsyzdyq...
Aýylyn, týǵan jerin jaqsy kórmeıtin adam joq. Aýylǵa degen rııasyz kóńilin, sheksiz mahabbatyn «I love» dep emes, «aınalaıyn, aýylym» dese, bul tirkes mahabbatyn jetkize almaı taqııasyna tar kelip jatsa, «Súıemin seni, Aqtaý!» degen tárizdi keltirýge bolmas pa edi?!
Áıteýir aýyldarda aǵylshyn tili tuǵyrǵa minip, nyǵaıyp tur...
Mańǵystaý oblysy
