Ilııas Jansúgirov atyndaǵy Jetisý memlekettik ýnıversıteti memlekettik ataýdan shyǵyp, Qazaqstan Respýblıkasy Úkimetiniń 2019 jylǵy 11 qazandaǵy №752 qaýlysyna sáıkes «Ilııas Jansúgirov atyndaǵy Jetisý ýnıversıteti» kommersııalyq emes aksıonerlik qoǵamy bolyp quryldy. Bul týraly ýnıversıtet rektory Qýat Baımyrzaev jergilikti jýrnalısterge bergen suhbatynda málimdegen.
- Qazirgi ýaqytta memlekettik joǵary oqý oryndary kommersııalyq emes aksıonerlik qoǵamǵa aınaldy. Alaıda, bizdiń aksııalarymyzdyń 100 paıyzy QR Bilim jáne ǵylym mınıstrligine tıesili. Onyń ústine Prezıdenttiń ózi memlekettik joǵary oqý oryndarynyń satylmaıtyny týraly naqty aıtty. Sondyqtan alańdaýǵa esh negiz joq, - dedi ýnıversıtet rektory.
Sondaı-aq Qýat Baımyrzaev bul ózgeristiń ýnıversıtet úshin oń tusy kóp ekenin de atap ótti.
- Buryn kóp suraqtarymyzdy mınıstirlikke jiberetinbiz. Al, qazir akademııalyq bostandyǵymyzǵa baılanysty ol máselelerdiń barlyǵyn ózimiz sheshe alatyn jaǵdaıǵa jettik. Oqý baǵdarlamasynyń 90 paıyzy ózimizde qurastyrylady. Qalǵan 10 paıyzyna tek mindetti pánder kiredi. Endi biz oqý baǵdarlamasyn qurastyrý barysynda «Atameken» palatasymen jáne jumys berýshilermen kelisim jasaımyz. Nege? Sebebi qazir joǵarǵy oqý oryndarynyń reıtıngi ýnıversıtet túlekteriniń jumysqa ornalasýymen ólshenedi. Moıyndaý kerek, qazir jas mamandardyń jumysqa turýynda krıterııler bar. Osynyń aldyn alý úshin biz jumys beretin mekemelermen kelisip, olarǵa qandaı mamandar qajet ekenin surastyramyz. Olar mamandyqty kórsetip jáne sol salany meńgerip shyqqan jas mamannan belgili bir kásibılikti talap etedi. Biz osylardy eskerip, oqý baǵdarlamasyn qurastyramyz. Keıin ózimizden oqyp shyqqan túlekter ol jaqta sapaly qyzmet etip jatyr ma, álde biliktilikteri tómen be degen sııaqty saýaldar joldanady. Eger kem tustary bolyp jatsa, aldaǵy ýaqytta onyń ornyn tolyqtyrýǵa kúsh jumsaıymyz. Iаǵnı, bul ýnıversıtetimizdiń básekelestigin arttyrady, - dep túsindirdi jetisýlyq JOO rektory.
