Taýda bir ret bolǵan adam onyń erekshe aıbyndylyǵy men sulýlyǵyn uzaq ýaqyt umyta almaıdy. Bizdiń aldymyzdan súrleýdiń ár burylysynan kókke umtylǵan taý shyńdary, tómen qaraı syldyraı aqqan sarqyramalar, bókterge tamasha jaıǵasqan aǵashtar shyǵady. Quddy, keýdeńe ulylyqtyń nuryn tógip turǵandaı.
Taý – tabıǵattyń eń keremet jetistigi. Olar asqaq ári qudiretti. Alystan kóz qadasań, jyly shyraıly sekildi. Solaı bola tura qaterli ári qaýipti. Tákappar taýlardy súıgen sýretshi ǵana óz kartınalarynda onyń kúshi men jumbaq sıqyryn jetkize alady.
Bizdiń aldymyzda Shamalǵan taýlarynyń ǵajap kórinisteri kósilip jatyr. Taýdyń sýreti kenep betin túgeldeı jaýyp, bıikke umsynady. Sýrettiń tek tómengi jaǵynan salt attylar júrip bara jatqan jińishke joldy kóremiz. Olar taýdyń ásem kórinisteriniń áserinen baıqalmaıdy da. Sol kishkentaı beıneler kóshpeli qazaqtyń ómirinen syr tartatyndaı.
Oqyrman bul sulýlyqty birinshi plandaǵy qoshqyl tústermen boıalǵan taýda turyp baqylaıdy. Sodan keıin biz jasyl túspen kómkerilgen taý bókteriniń tizbegin kóremiz. Al samal jel soǵyp turǵan shyńdary tastaqty jynystarymen túksıip tur. Kartına boıymen sál joǵary kóterilseńiz, solardyń arǵy jaǵynan kóz jaýyn alatyn appaq qarly taý shyńy shyǵa keledi. Qarly shyńdar birinshi jáne ekinshi plandaǵy taýlarǵa múlde keraǵar ornalasqan. Olar kógildir aspan astynda aýada salmaqsyz qalyqtap turǵandaı. Bular – qatyp qalǵan tap-taza móldir muz qabattarynyń saqtaýshysy.
Áýbákir Ysmaıylov óz kartınasynda taýdyń qudiretin, olardyń boıyndaǵy qupııany jáne ózine qarap turǵan adamdy sendiretin sheksizdik pen myzǵymastyq sezimin jetkizgen. Sýretshi keıingi urpaq úshin tumsa tabıǵattyń aspanmen astasyp jatqanyn uǵyndyryp, jer men kóktiń tutastyǵyn kenep betine jazyp, qaldyryp ketti. Mundaǵy oı – qazaqtyń darqan dalasynyń ár bóligi janǵa shýaq, kóńilge qýanysh syılaıtynyn dáleldeý.
