JYLJYMALY QOǴAMDYQ QABYLDAÝ SAPARLARY

Elbasy Nursultan Nazarbaevtyń “Jańa onjyldyq – jańa ekonomıkalyq órleý – Qazaqstannyń jańa múmkindikteri” atty el halqyna bıylǵy Joldaýynda “Eldi jańǵyrtý strategııasynyń tabystylyǵy, eń aldymen, qazaqstandyqtardyń bilimine, áleýmettik jáne dene bolmysyna, kóńil-kúılerine baılanysty” dep atap kórsetildi. Osy máselelerdi sheshýde “Nur Otan” HDP biriktirýshi kúsh bolýy qa­jet­tigin aıta kelip, quqyq qorǵaý organdaryna jumys ádisterin jetildirýdi, quqyqtyq refor­maǵa atsalysýdy mindettegen-di. Osy talap údesinen kórinýdiń sátti qadamdary retinde “Nur Otan” HDP Aqtóbe oblystyq fılıaly­nyń qoldaýymen Batys aımaqtyq kólik pro­kýratýrasynyń, Batys kóliktegi ishki ister depar­tamenti men “Qazaqstan temir joly” UK” AQ Aqtóbe jol bólimshesiniń uıytqy bolýy­men Batys kólik aımaǵyna qarasty eldi meken­derde “Jyljymaly qoǵamdyq qabyldaý” atty áleýmettik aksııa bastaldy. Onyń maqsaty – atalmysh organdardyń birinshi basshylaryna ótinish bildirý úshin múmkinshiligi joq halyqtyń az qamtylǵan tobynyń ókilderin jergilikti jerde qabyldap, aryz-shaǵymdaryna qulaq asý, olardyń quqyqtary men bostandyqtaryn qor­ǵaý, zańnamalyq kómek berý, quqyq buzýshy­lyq­tyń aldyn alý, ózekti máselelerdi qolma-qol sheshý, kúrdelilerin tıisti oryndarǵa jet­kizip, sheshimin tabýǵa yqpal etý bolyp tabylady. Quramynda “Nur Otan” HDP Aqtóbe oblys­tyq fılıalynyń tóraǵasy, oblystyq más­lı­hat­tyń hatshysy Balǵalı Odabaev, Batys aımaqtyq kólik prokýrory Seıfolla Kemalov, Batys kóliktegi ishki ister departamenti bas­ty­ǵynyń orynbasary Serik Aldashev jáne “Qazaq­stan te­mir joly” UK” AQ Aqtóbe bólim­shesi dırektory­nyń birinshi orynbasary Vladımır Petrov bar jyljymaly qoǵamdyq qabyldaý jasaýshylar mingen shaǵyn poıyz aldymen Alǵa stansasyna aıal­dady. Munda qoǵamdyq qabyldaý jasaýshy­lar­dy Alǵa aýda­ny ákiminiń orynbasary Nurhan Aǵnııazov qar­sy aldy. Qabyldaýǵa alǵashqy bolyp kir­gen jas maman Aqtolqyn Nurmaǵambetova bir jyldan beri jumysqa ornalasa almaı júrgenin jetkizdi. Aqtóbe temir jol bólimshesi dırek­tory­nyń orynbasary Vladımır Petrov bul mamandy kadrlyq rezervke qoıyp, jumysqa turýyna qoldaý jasaıtynyn aıtty. Sondaı-aq, osy stansanyń qyzmetkeri Jadyra Seleýova­nyń “Astana-Aqtaý” poıyzynyń aıaldaıtyn ýaqytyn 2 mınótten 5 mınótke uzartý, aýdan­dyq más­lı­hat depýtaty Merlan Jalǵasbaevtyń Toqmansaı stansasyndaǵy osyndaı jaǵdaı jáıli ótinishi de sheshimin tabatyn boldy. Jer, úı, bankterden nesıe ala almaı júrgen stansa kezekshisi Samat Murataev, Klara Aımýrzına, kassır Elmıra Ahmetovanyń ótinish­terin sheshýdiń zańdy joldaryn qarastyrýdy Alǵa aýdany ákiminiń orynbasary Nurhan Aǵnııazov qaperge aldy. Jyljymaly qoǵamdyq qabyldaýshylardyń qatary Qandyaǵash stansasynda Muǵaljar aýdanynyń ákimi Serik Shańǵutov pen onyń orynbasary Jangeldi Qurmashev jáne aýdan­dyq mekemelerdiń basshylarymen tolyqty. Qoǵamdyq qabyldaýǵa kelgen Nurlan Esenama­nov “Jastyq” shaǵyn aýdanynda sýdyń ýaqyt­pen beriletinine qynjylys bildirdi, Raýshan Muratova stansada medpýnkt ashý máselesin alǵa tartty. Sonymen birge, jumysqa orna­lasý­dyń qıyndyǵyn kóldeneń tartqan aza­mattar da boldy. Aýdan ákimi Serik Shańǵutov Qandyaǵash qalasynyń sý júıesine qyrýar qarjy jumsalyp, kúrdeli jóndelgenin, sýdyń turǵyn úılerge deıin úzilissiz baryp turǵany­n, qalǵanyn kooperatıvter men kondo­mı­nıýmder arqyly sheshý qajettigin málimdedi. Jáne bul máseleniń qalalyq ákimdiktiń ba­qy­laýy­na alynatynyn da jetkizdi. Medpýnkt ashýǵa kadrdy daıyndap qoıǵandaryn, tek másele oǵan qajetti orynǵa tireletinin aıtty. Al jumysqa ornalasa almaı júrgenderdi óziniń qabyldaýyna kelýge shaqyrdy. Aýdanda úsh-tórt zaýyt ashylyp jatyr,oǵan adam taba almaı otyrmyz, dedi ol. Temir jolǵa ornalas­qysy keletinderdiń ótinishin qanaǵattandyrýǵa osyndaǵy temir jol mekemeleri basshylary­nyń yqylas bildirmeı­tinin, árkimderden osy­nyń astarynda ózderiniń jeke bas múddeliligi bar degendi estip júrgenin de jasyrmady. Sondyqtan biletinderdiń tıisti oryndarǵa habarlasýyn surady. Medbıkelik mamandyǵy bar Qazyna Tólegenovaǵa qabyldaýyna kelýin surady. Múmkindiginshe jumysqa ornalasýǵa kómektesemin, dedi ákim. Osyndaǵy vagon deposynyń nusqaýshysy Bolatbek Baınııazov balasyn balabaqshaǵa or­na­lastyra almaı júrgenine, al zeınetker Qash­qynbaı Ybrashev eńseli Mádenıet úıi joqtyǵyna shaǵymdanǵan-dy. Aýdan ákiminiń orynbasary Jangeldi Qurmashev balabaqshaǵa kezektiń kóptigin aıta kelip, birer adamnyń máselesin sheshýge bolatynyn, al 180 oryndyq Mádenıet úıiniń smetalyq-jobalaý qujattary daıyn ekendigin, qarjylyq daǵdarysqa baı­lanysty onyń qurylysy 2012 jylǵa shegerilip otyrǵanyn jetkizdi. Aqtóbe temir jol bólim­shesi dırektorynyń birinshi orynbasary Vla­dımır Petrov qoǵamdyq qabyldaýda kóterilgen máseleler jumys tártibi jaǵdaıynda sheshi­le­tinin jetkizdi. Halyqtyń muń-muqtajyn qa­shanda nazarda ustaıtyn Muǵaljar aýdany­nyń ákimi Serik Shańǵutov qoǵamdyq qabyl­daýǵa kelgen azamattardyń qaı-qaısysynyń da máseleleri zańdylyqqa sáıkes oń sheshiletinine sendirdi. Osy saparda qoǵamdyq qabyldaýda 36 adam bolyp, óz ótinish-tilekterin jetkizdi. Budan basqa, osyndaǵy temir jol uıymdarynyń 100-den astam jumysshysy arasynda eńbek zańdylyqtarynyń saqtalýy jáne áleýmettik-turmystyq máseleler jáıli saýaldama júrgizildi. Olarda kóterilgen problemelar boıynsha sharalar alynatyn boldy. Batys aımaqtyq kólik prokýratýrasy muryndyq bolǵan osy ıgi bastama alda on eki baǵyt boıynsha jalǵaspaq. “Nur Otan” HDP Aqtóbe oblystyq fılıaly qoǵamdyq qabyldaý bóliminiń meńgerýshisi Amangeldi Mektepbaev endi Aqtóbe-Mártók baǵytyndaǵy temir jol boıymen osyndaı jyljymaly qoǵamdyq qabyldaý júrgiziletininen habardar etti. Sondaı-aq osyndaı jyljymaly qoǵamdyq qabyldaýlar MAI qyzmetkerlerimen birlesip avtomobıl kóligimen de júzege asyrylatyn bolyp sheshildi. Satybaldy SÁÝIRBAI. Aqtóbe oblysy.