О́tken jyly pandemııanyń saldarynan munaı óndirý kóleminiń 10 paıyzǵa tómendeýi óńirdegi munaı kásiporyndary janynda shoǵyrlanǵan shaǵyn jáne orta kásipkerlik nysandaryna zardabyn tıgizip, úlken kompanııalardan alatyn tapsyrystar kólemi tym azaıyp ketti ne múlde bolmaı qaldy. Degenmen, pandemııa kezinde adamdar men tehnıka qozǵalysynyń aıtarlyqtaı shekteýli bolǵandyǵyna qaramastan, ekonomıkanyń birneshe salalarynda tómendeý bolǵan joq.
«Soǵan qaramastan qolda bar múmkindikterdi paıdalanyp, ekonomıkanyń kúrt tómendeýine jol bermeıtin jáne ári qaraı qalpyna keltiretin sharalar qabyldaý nátıjesinde jaǵdaı turaqtandy. Nátıjesinde negizgi áleýmettik-ekonomıkalyq kórsetkishter boıynsha oń dınamıkaǵa qol jetkizildi. Atap aıtqanda, ónerkásiptik kásiporyn 1,8 trln teńgeniń ónimin óndirip, 646,8 mlrd teńge ınvestısııa tartyldy», dep atap ótti Ońdasyn Orazalın.
О́tken jyl boıynsha Aqtóbe oblysy aýyl sharýashylyǵynyń damýy boıynsha respýblıkada aldyńǵy orynǵa shyqty.
Jumystyń tıimdi uıymdastyrylýynyń arqasynda, kóktemnen bastap on eki aýdandaǵy aýyl sharýashylyǵy qurylymdary men sharýa qojalyqtaryna 20,4 mlrd teńge kóleminde sýbsıdııa, 47,8 mlrd teńge jeńildetilgen nesıeler berildi. Oǵan sharýalar negizinen tuqym, tyńaıtqysh satyp aldy, ne aldyńǵy jyldardan beri jınalǵan qaryzdaryn japty.
Kóktemdegi qatań karantınge qaramastan egis jumystaryn der kezinde júrgizýge múmkindik bolǵandyqtan, sharýalar kúzgi ónim jınaý kezinde aıtarlyqtaı qıyndyq kórgen joq. Jergilikti taýar óndirýshiler ónimderin qys boıy jergilikti rynokta satýǵa múmkindik aldy. Osylaısha jergilikti sharýashylyqtar óz ónimderin ishki rynokta satýdan qıyndyq kórgen joq. Oǵan taýar ótkizýdegi bıýrokratııalyq kedergilerdiń joıylýy men pandemııaǵa baılanysty syrttan keletin taýarlarǵa qoıylǵan shekteýlerdiń arqasynda qol jetkizdi. Kópshilik sharýa qojalyqtary kúzde satylǵan ónimnen túsken tabysyna lızıngpen tehnıka aldy.
Memlekettik qoldaý jem-shópti sýbsıdııalaý kóleminiń artýy arqasynda múmkin bolǵandyqtan, jyl sońynda óńirdegi aýyl sharýashylyǵynyń damýy 6,7%-ǵa joǵarylap, osy saladaǵy óndirilgen ónim kólemi 324,7 mlrd teńgeni qurady.
Bıylǵy kóktemde aýyl sharýashylyǵyn qoldaý jumystary jalǵasatyn bolady.
