«Ǵashyq-júrek» premerasy usynyldy

Aqıyq aqynnyń 90 jyldyǵyna arnalǵan premeraǵa QR mádenıet jáne sport vıse-mınıstri Nurqısa Dáýeshov, Nur-Sultan qalasy ákiminiń orynbasary Baqtııar Mákenuly, Qazaqstannyń eńbek sińirgen qaıratkeri, halyqaralyq «Alash» ádebı syılyǵynyń ıegeri Dáýletkereı Kápuly, Qazaqstannyń eńbek sińirgen qaıratkeri, jýrnalıst Shárbaný Qonaqbaıqyzy Beısenova jáne Qazaqstannyń Jazýshylar odaǵy músheleri, basqa da kóptegen aqyn jazýshylar arnaıy qatysty.

Shara barysynda QR mádenıet jáne sport vıse-mınıstri Nurqısa Dáýeshov aqıyq aqyn M.Maqataevtyń ónegege toly  shyǵarmalary keler urpaqqa qaldyrǵan asyl mura ekenin, sondaı-aq QR Prezıdenti Qasym-Jomart Kemeluly Toqaev barsha qazaqstandyqtardy búgingi erekshe kúnmen arnaıy quttyqtaǵanyn bylaı jetkizdi:

- Muqaǵalı Maqataevtyń ósıet pen ónegege toly  shyǵarmalary – keler urpaqqa qaldyrǵan asyl murasy. Memleket basshysy Qasym-Jomart Kemeluly Toqaev barsha qazaqstandyqtardy búgingi erekshe kúnmen arnaıy quttyqtady. Mádenıet jáne sport mınıstrligi bıyl M. Maqataevtyń 90 jyldyǵyna oraı basqa óńirlermen birlesip kóptegen sharalardy josparlaýda. Osyndaı sharalar bizdiń rýhanııatymyzdy baıyta túsedi. Nur-Sultan qalasy ákimdiginiń Mýzykalyq jas kórermen teatry keshe ǵana ashylsa da, óz kórermenderiniń júreginen erekshe oryn alyp úlgerdi. Oǵan óte qýanyshtymyz. Sondyqtan árqashan qazaq óneriniń, qazaq mádenıetiniń týy bıik bolsyn! Shyǵarmashylyq ujymǵa alǵys aıtamyn jáne sáttilik tileımin! – dedi vıse-mınıstr Nurqısa Dáýeshov.

Poezııa men Muqaǵalı, aqynnyń óz óleńinde tolǵanǵanyndaı, egiz uǵymǵa aınalyp ketkeni ras. Poezııa dese birden oıymyzǵa kele qalatyn tulǵalardyń biri de osy Muqaǵalı ekeni anyq. Sondyqtan da, halqymyzdyń asyl perzentiniń, ádebıetimizdegi úlken sýretkerdiń esimi árqashanda el esinde júrýi tıis. Osy maqsatta Elordamyzdaǵy bir mektepke aqynnyń esimin berýdi usynyp jatqanyn Nur-Sultan qalasy ákiminiń orynbasary Baqtııar Mákenuly aıtyp berdi.

- Muqaǵalı atamyzdyń mereıtoıy qutty bolsyn! Bolashaqta osy mereıtoıdy jyl saıyn qarsy alyp, basqa mekemelerde de, bilim oshaqtarynda da birigip uıymdastyramyz degen senimimiz mol. Nur-Sultan qalasynda №74 mektepke Muqaǵalı Maqataevtyń atyn berýdi usynyp jatyrmyz. Meniń oıymsha, Elordada rýhanııat pen mádenıettiń damýynda kóp eńbek atqaryp júrgen tulǵalardyń atyn shyǵarý óte mańyzdy. Sondyqtan búgingi mádenı keshimiz qutty bolsyn! – dedi Nur-Sultan shahary ákiminiń orynbasary Baqtııar Maken.

Jýrnalıst, Qazaqstannyń eńbek sińirgen qaıratkeri Shárbaný Beısenova bolsa, qazaqtyń qara óleńiniń úlken qudiretin kórsetken aqyn – M.Maqataevtyń arýaǵy úshin osyndaı qoıylym kórsetilip jatqanyna, Mýzykalyq jas kórermen teatry ashylǵannan beri turaqty kórermenine aınalǵanyn aıtyp, óziniń júrekjardy tilegin, alǵysyn bildirdi.

- Búgin qazaqtyń qara óleńiniń úlken qudiretin kórsetken aqyn – Muqaǵalı Maqataevtyń qurmetine osyndaı qoıylym kórsetilip jatyr. Adam ózi óleńdi tazarý úshin oqıdy dep oılaımyn. Adamnyń sanasyn, kóńil-kúıin dál osy óleńdeı, kúıdeı tazartatyn qudiret joq shyǵar.  Sondyqtan jastarymyz óleń oqyp ósse, bizdiń ádebıetimizdi tanyp bilse,  elimizdiń keleshegi zor bolady. Biz osy teatr ashylǵannan beri turaqty kórermenine aınaldyq. Aqıyq aqynnyń 90 jyldyǵy qutty bolsyn! Jaqsy keshte kezdeseıik! – dedi Shárbaný Qonaqbaıqyzy.

Al Mýzykalyq jas kórermen teatrynyń dırektory, Qazaqstannyń eńbek sińirgen qaıratkeri Ashat Maksımuly Maemırov osy «Ǵashyq-júrek» qoıylymynda M.Maqataevtyń óleńderi arqyly óziniń búkil bolmysyn kórsetpek bolǵanyn aıtyp jáne búgingi keshke kelgen qonaqtarǵa rızashylyǵyn bildirdi.

- Biz búgin kórermenderdi qazaq poezııasynyń aqıyq aqyny M.Maqataevtyń óleńderimen tanystyrýdy jón sanadyq. Bul «Ǵashyq-júrek» qoıylymy óleńder arqyly aqynnyń búkil bolmysyn kórsetpek! Qazir qoǵamda «Jastar poezııany oqymaıdy, óleńderdi kóp túsinbeıdi» degen kereǵar uǵym bar. Sondyqtan, osy sahnalanyp jatqan qoıylym erekshe shynaıy sezimderdi tarqatatyn bolady. Jas urpaqtyń boıynda aqyn shyǵarmashylyǵy týraly erekshe oı qalyptastyrady dep oılaımyn! Ultymyzdyń baǵyna bitip, barsha qazaqtyń júregine jyr bolyp sińgen Muqaǵalı Maqataevtyń týǵan kúnine arnaıy qoıylyp jatqan premeraǵa kelgenderińiz úshin alǵysymdy bildiremin!, – dedi teatr dırektory Ashat Maemırov.

«Ǵashyq-júrek» spektakli –  avtordyń oı-armanynan, jan saraıynan, ishki tanymy men tolǵanysynan týǵan óleń-jyrlary men ánderine qurylǵan sahnalyq qoıylym. Teatr akterleri qala turǵyndary men qonaqtaryna úılesimdilik pen tartymdy rejısserlik komponetterden qurylǵan tamasha mýzykalyq kesh syılady.

Qoıylymnyń qoıýshy-rejısseri Aman Ǵumarov. Muqaǵalı Maqataevtyń beınesin teatr akteri Qazybek Esqara, al onyń dosy Shámildiń beınesin akter Ernazar Jańatilek somdady. Sondaı-aq, spektaklge teatrymyzdyń barlyq artısteri qatysty. Qoıylymdy mýzykamen súıemeldegen – teatr orkestri, mýzykasyn árlegen – Bolat Joldasov.

Poetıkalyq-mýzykalyq qoıylymda muzbalaq aqynnyń «Esińe meni alǵaısyń!», «Kún qaıda», «Ana, sen baqyttysyń», « Japyraq júrek jas qaıyń»,  «Otyzdan asyp baramyn», «Qum ǵana aýǵan», «Kúreń kúz», «Baqyt degen», «Sábı bolǵym keledi», «Qaıran jeńgem», «Qazaqstanym» shyǵarmalary jáne odan basqa «Altaı-Atyraý»  poemasy, sondaı-aq «Baqyt degen ne ózi?!», «Shyda, shyda», «Súıedi ekem», «Shámil-aý», taǵy basqa  óleńderi oqyldy.

Elimizde oryn alyp otyrǵan pandemııa jaǵdaıyna baılanysty Mýzykalyq jas kórermen teatrynda barlyq sanıtarlyq talaptar saqtaldy. Osy tártipte «Ǵashyq-júrek» mýzykalyq poetıkalyq qoıylymy 10, 11 aqpanǵa deıin jalǵasady.