Aımaqtar donorlar men mesenattar kezdesýine beıne-konferens-baılanys arqyly qosyldy. Sondaı-aq, atalǵan kezdesý Aqparat jáne qoǵamdyq damý mınıstrliginiń áleýmettik jelidegi paraqshasynda tikeleı efırde kórsetildi.
Is-sharaǵa mınıstr Aıda Balaeva, bıznes jáne úkimettik emes sektor, qaıyrymdylyq jáne eriktiler uıymdary ókilderi, atap aıtqanda, «Aitas KZ» AQ prezıdenti Ksenııa Verba, «Altyn Qyran Foundation» qorynyń dırektory Aıtmaǵanbet Maqsutbek, Qazaqstannyń volonterler lıgasynyń tóraıymy Ernııazova Aısulý jáne basqalar qatysty.
Eske sala keteıik, 2020 jyl – Volonterlik jyly dep jarııalanyp, barsha qazaqstandyqtardy qaıyrymdy ister aıasynda biriktirdi. «Búgingi tańda elimizdegi volonterler sany 100 myńǵa jýyq adamdy quraıdy. Olar úshin «adamdarǵa kómek berý» tek joǵary gýmanıstik áreket emes, ómirdiń normasy men jan qalaýy», — dedi Aıda Balaeva.
Qatysýshylar qaıyrymdylyq bastamalar, eriktiler qyzmetin damytýdaǵy bıznestiń róli, donorlyq qyzmettegi halyqaralyq tájirıbe, qoǵamnyń áleýmettik mańyzdy máselelerin sheshýde azamattyq belsendiliktiń róli, qazaqstandyq volonterlik tájirıbe týraly oılarymen bólisti.
Azamattyq bastamalardy qoldaý ortalyǵynyń basshysy Lıma Dıas «Qaıyrymdy ister marafony» ulttyq jobasymen tanystyrdy. Atap aıtqanda, bilim berý mekemelerinde (mektep, kolledj, ýnıversıtet) synyp saǵattary, onlaın-trenıngter men fandraızıng, korporatıvti volonterlik boıynsha sheberlik dáristeri ótedi. Marafonǵa barlyq qazaqstandyqtar, onyń ishinde memlekettik jáne qoǵamdyq uıymdar, bıznes ókilderi, bilim berý mekemeleri qatysa alady.
Talqylaý barysynda korporatıvti sektordyń ókili Ásel Qojaqova BAQ ókilderin marafon sharalary týraly aqparattandyrýda belsendi qatysýǵa, adamdardy jaqyndary men muqtaj adamdarǵa jaqsylyq jasaýda aqparattyq túrtki bolýǵa shaqyrdy. Kezdesý barysynda, pikiralmasýǵa Batys Qazaqstan oblysy ákiminiń birinshi orynbasary Muhtar Mankeev te qosylyp, «Qaıyrymdy ister marafony» sharalaryna shetelde turatyn otandastardy tartýdy usyndy.
Aıda Balaeva óziniń qorytyndy sózinde barlyq azamattyq qoǵam ınstıtýttaryna jergilikti jerlerde belsendi bolyp, búkilhalyqtyq ıgilikti isterge óz úlesterin qosýǵa shaqyrdy.
«Men mesenattyq qyzmetti júzege asyratyn barlyq kásipkerlerge qoǵamdyq jáne azamattyq bastamalardy belsendi túrde qoldaýǵa shaqyramyn», - dedi mınıstr.
Qatysýshylar qoǵamdy osy joba aıasynda biriktirýdiń mańyzdylyǵy – memleket pen qaıyrymdylyq uıymdarynyń ózara tyǵyz áriptestiginde ekenin atap ótti.
