Aksııa ótken jyldyń qazan aıynda bastaldy jáne onyń aıasynda 3 myńnan astam adam jeke basyn kýálandyratyn qujattaryn aldy. Olardyń kópshiligi Almaty qalasynda (300), Almaty (372), Qaraǵandy (353), Aqmola (279), Jambyl (276) jáne Túrkistan (284) oblystarynda anyqtaldy. Elordada 189 adamǵa qujattar berildi. Aksııany aǵymdaǵy jyldyń qańtar aıynda aıaqtaý josparlanǵan bolatyn, alaıda qujatsyz tulǵalar sanyn qysqartýdyń mańyzdylyǵyn eskere otyryp, jumysty mamyrǵa deıin uzartý týraly alqaly sheshim qabyldandy.
Mınıstr Erlan Turǵymbaev Kóshi-qon qyzmeti komıtetine azamattardy qujattandyrýǵa baǵyttalǵan jumysty jalǵastyrýdy tapsyrdy.
– Azamattyǵy joq adamdardy anyqtaý álemdik problema bolyp tabylady, muny tekserýge jáne anyqtaýǵa kóp ýaqyt ketedi. Osyǵan qaramastan, ótken jyly iske qosylǵan aksııa myńdaǵan adamǵa qujattaryn alýǵa kómektesti jáne aldaǵy aılarda elimizdiń taǵy birneshe myń turǵyny qujattaryn rásimdeı alady, – dedi mınıstr Erlan Turǵymbaev keńes barysynda.
Vedomstvo basshysy atalǵan aksııanyń áıelder úshin mańyzy zor ekenin atap ótti. Jas qyzdardan kúıeýleri nemese birge turatyn adamdary qujattaryn tartyp alatyn jaǵdaılar da kezdesip jatady. Sonymen qatar, áıelderdi jezókshelikpen aınalysýǵa májbúrleıdi nemese olar eńbek quldyǵyna túsedi.
– Eger áıelder osyndaı jaǵdaıǵa tap bolsa, ol aýmaqtyq kóshi-qon qyzmeti bólimshesine júgine alady nemese “102” mobıldi qosymshasy arqyly habarlama jibere alady. Polısııa qyzmetkerleri qujattardy zańdy túrde tegin rásimdeýge kómektesedi, – dedi eldiń bas polıseıi.
Mınıstr azamattyǵy joq adamdardy anyqtaýǵa jáne qujattaý rásimine úkimettik emes jáne volonterlik uıymdar úlken kómek kórsetetinin atap ótti. IIM quqyq qorǵaýshylarǵa jáne barlyq beı-jaı qaramaıtyn azamattarǵa azamattyǵy joq adamdardyń problemalaryn sheshýge kómekteskeni úshin alǵys bildiredi.
Mańyzdy aqparat: Azamattyǵy joq adamdar Qazaqstan Respýblıkasynyń azamattary sııaqty quqyqtar men mindetterdi atqarady. Olar jumysqa ornalasa alady, emhanalardan qyzmet ala alady, bilim ala alady. Budan ári azamattyǵy joq adamdar Qazaqstan Respýblıkasynyń azamattyǵyn ala alady.
