Qoǵam • 16 Aqpan, 2021

Jambyl Jabaevtyń 175 jyldyǵyna oraı birqatar is-shara ótedi

Qazaq memlekettik fılarmonııasy Jambyl Jabaevtyń 175 jyldyǵyna oraı birqatar is-shara ótkizedi, dep habarlaıdy Egemen.kz.

Marzhan Tileubekova

Elbasy Nursultan Nazarbaevtyń: «Uly dalanyń jeti qyry» maqalasyndaǵy «Uly adamdardy maqtan tutý kerek. Olardyń esimderi tarıhta joǵalmaýy kerek, búgingi kúnniń maqtanyshy bolýy kerek», - degen sózderine súıene otyryp, Jambyl atyndaǵy Qazaq memlekettik fılarmonııasy óner salasyndaǵy ótken jáne qazirgi zamannyń uly qaıratkerleriniń beınelerin qalyptastyrýǵa jáne olardyń shyǵarmashylyǵyn ulyqtaý maqsatynda jyr alyby Jambyl Jabaevtyń 175 jyldyǵyna oraı birqatar aýqymdy is-sharalar jobasyn uıymdastyrýdy josparlap otyr.

Jambyl Jabaevtyń shyǵarmashylyǵy bizdiń elde ǵana emes, sonymen qatar, alys-jaqyn shetelderde keńinen tanymal. Halyq poezııasyndaǵy jańa órleý onyń esimimen tyǵyz baılanysty.

Qazaq memlekettik fılarmonııasy osy ıgi bastama negizinde:

• Patrıotızmdi, rýhanı-adamgershilik úılesimdilikti damytýdy jáne jańa tehnologııalardyń kómegimen jastardyń kórkemdik talǵamyn tárbıeleýdi, kásibı dástúrli mýzyka álemine baýlýdy;

• Almatydaǵy mádenı-aǵartý mekemeleri men ujymdarynyń ózara araqatynasyn jáne tájirıbe almasýyn uıymdastyrýdy, keleshekte birlesken shyǵarmashylyq jumystar isteýine yqpal etýdi;

• Qazaqstandyq jas óner ókilderiniń qalyptasýy men damýyna yqpal etýdi, olardyń shyǵarmashylyq áleýetin is júzinde iske asyrýǵa járdem berýdi;

• Qoǵamnyń Jambyl Jabaevtyń shyǵarmashylyǵyna degen yntasyn oıatyp, qyzyǵýshylyǵyn arttyrýdy, jyr alybynyń baǵa jetpes ulttyq murasy arqyly halyqtyń rýhanı deńgeıin damytýdy;

• Qazaqstandyq ónerdiń jas ókilderi men eńbek sińirgen qaıratkerleriniń qatysýymen, uly aqynnyń týyndylaryn mýzykalyq-poetıkalyq jáne teatrlandyrylǵan is-sharalar formatynda usynýdy kózdeıdi.

Atalǵan aýqymdy joba aıasynda:

• 22-aqpan kúni saǵat 19.00-de halyqaralyq konkýrstardyń laýreaty, ánshi Birjan Báziljan men QR mádenıet qaıratkeri, kúıshi Erjan Álimbetovtyń dástúrli óner keshi ótedi.

• 5-18 sáýir aralyǵynda Jambyl atyndaǵy memlekettik jasóspirimder kitaphanasynyń uıytqysymen Jambyldyń óleńderin mánerlep oqýdan jasóspirimder arasynda onlaın-baıqaý jarııalanady.

• 14-sáýir kúni 19.00-de N.Tilendıev atyndaǵy akademııalyq folklorly-etnografııalyq «Otyrar sazy» orkestriniń konserti ótedi.

• 28-mamyr kúni 19.00-de T.Júrgenov atyndaǵy Qazaq ulttyq óner akademııasynyń stýdentteriniń, mánerlep oqý saıysynyń jeńimpazdarynyń jáne fılarmonııanyń beldi solısteriniń qatysýymen mýzykalyq jáne teatrlandyrylǵan qoıylym ótedi.

• Sonymen qatar, Fılarmonııa foıesinde «Almaty qalasynyń Ortalyqtandyrylǵan kitaphana júıesi» jyr alybynyń shyǵarmashylyǵyna arnalǵan jyljymaly kórmesin kesh qonaqtarynyń nazaryna usynady.

Baıqaý týraly tolyq aqparat Fılarmonııanyń áleýmettik jelidegi paraqshasynda jarııalanady.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz