Osylaısha, megapolıstiń kóshe shamdarymen qamtamasyz etilýi 70 paıyzdy quraıtyn bolady. Jaryqtandyrý boıynsha jobalar jetinshi shaqyrylymdaǵy Shymkent qalasy máslıhatynyń kezekten tys ekinshi sessııasynda maquldandy.
Sessııa jumysyna qatysqan qala ákimi Murat Áıtenov Shymkent qalasynda ártúrli salalarda memlekettik- jekemenshik áriptestik (MJÁ) aıasynda salynyp, paıdalanýǵa berilgen nysandardyń artqanyn aıtty. Sonymen qatar, qala basshysy MJÁ aıasyndaǵy jobalar eki tarapqa da tıimdi ekenin jetkizdi.
«Shymkent qalasynyń syrtqy jaryqtandyrýdyń qurylysyn salý, qaıta qurý jáne paıdalaný» jobasy boıynsha baıandama jasaǵan qalalyq energetıka jáne kommýnaldyq sharýashylyq basqarmasy basshysynyń mindetin atqarýshy B.Bolatbekov 2021-2027 jyldarǵa 16 411,9 mln. teńgege memlekettik mindetteme alý usynylǵanyn málim etti.
«Memlekettik-jekeshelik áriptestik jobasyn iske asyrý merzimi – 7 jyl, onyń ishinde qurylys merzimi – 36 aıdy quraıdy. Bul jobada syrtqy jaryqtandyrý jelilerin salý, ıaǵnı, 14264 dana jaryqdıodty shamdar, 14264 dana baǵanalar men 436 km kabel júrgiziledi. Nátıjesinde tórt jylda 303 kóshe jaryqtandyrylatyn bolady. Sonymen qosa, eski jaryqshamdar men tozǵan baǵanalardy jańalaryna aýystyrý – 5 182 jaryqsham, 1 929 baǵanalar. Jaıaý júrginshiler aımaǵyna qosymsha shamdar ornatý - 2 000 dana. Áýe jelilerin kabeldik jelilerge aýystyrý -182 km. Syrtqy jaryqtandyrý basqarý jáshigin jańǵyrtý - 327 dana. Dıspetcherlik pýnkt qurý baǵdarlamasyn engizý bar», dedi B.Bolatbekov.
Sessııanyń kún tártibinde budan bólek, Shymkent qalasynyń basqarý shemasy týraly sheshimi men Shymkent qalasy máslıhatynyń 2021 jylǵa arnalǵan jumys josparyna ózgerister engizý máselesi qaraldy.
