«Biz qazir keshendi baǵdarmalar jasadyq, ıaǵnı bul – sport keshenderin salý. Bıyldyń ózinde bıýdjettiń esebinen alty sport kesheni salynady. Budan bólek jeke kásipkerler de keshender soǵyp jatyr. Ekinshi, ashyq alańdar jasalynýda. Biz osy ashyq alańda balalardy sportpen shuǵyldandyrý úshin tájirıbeli jattyqtyrýshylardy shaqyryp jatyrmyz», dedi Baqytjan Saǵyntaev.
Jalpy bıyl 10 sport nysanynyń qurylysy josparlanýda, onyń 6 - ýy jergilikti bıýdjet esebinen. Bul 5 dene shynyqtyrý-saýyqtyrý kesheniniń qurylysy, onyń ishinde qala shetinde Jetisý aýdanynyń «Aınabulaq - 2» shaǵyn aýdanynda, Medeý aýdanynyń «Alataý» shaǵyn aýdanynda, Túrksib aýdanyndaǵy «Jas Qanat», Jetisý aýdanyndaǵy «Kemel» jáne «Qulager» shaǵyn aýdandarynda. Sondaı-aq, Alataý aýdanynda jabyq jáne ashyq korttary bar tennıs ortalyǵynyń qurylysy josparlanǵan. Qurylys jumystary bastaldy, aıaqtalý merzimi - 2021 jyl.
Sonymen qatar, bıyl orta mektepterdiń 52 stadıonyn jańartý josparlanǵan. Balalardy tegin sport seksııalarymen qamtýdy arttyrý úshin mektep sporty Federasııasymen birlesip qala mektepterinde sport klýbtaryn ashý jumystary júrgizilýde. «Suńqar» Halyqaralyq shańǵy tramplıni kesheniniń 2-shi kezeginiń qurylys-montajdaý jumystary júrgizilýde, «Jańa Almaty» baǵdarlamasyna sáıkes sport seksııalaryn keńeıtý jumystary júrgizilýde, onyń basymdyqtary Naýryzbaı, Alataý, Túrksib jáne Jetisý aýdandarynyń turǵyndary úshin sporttyń qoljetimdiligi bolyp tabylady.
Atap ótetini, aǵymdaǵy jyly qala balalaryn sportpen, mádenıetpen jáne mektepten tys qosymsha bilim berýmen jappaı qamtý úshin 2020-2021 jyldarǵa arnalǵan Jol kartasy ázirlendi, ol Almaty qalasynyń bilim, sport, mádenıet, qoǵamdyq damý, qoǵamdyq densaýlyq saqtaý basqarmalarynyń birlesken sharalar qabyldaýyn kózdeıdi.
