Mádenıet jáne sport mınıstrligi, "Áziret Sultan" memlekettik tarıhı-mádenı qoryq-mýzeıiniń uıymdastyrýymen ótken konferensııaǵa tarıh ǵylymdarynyń doktorlary men professorlar – Jambyl Artyqbaev, Bereket Káribaev, Haziretáli Tursyn, fılologııa ǵylymdarynyń doktory, professor Seıdýlla Sadyqov, fılosofııa jáne teologııa ǵylymdarynyń doktory, professor Dosaı Kenjetaı, tarıh ǵalymdarynyń kandıdaty, dosent Zikirııa Jandarbek pen Tóráli Qydyr, taǵy basqa tarıhshylar men mýzeı qyzmetkerleri, stýdentter qatysty.
"Konferensııa Elbasy Nursultan Nazarbaevtyń "Bolashaqqa baǵdar: rýhanı jańǵyrý", "Uly dalanyń jeti qyry" baǵdarlamalyq maqalalary aıasynda jáne Táýelsizdigimizdiń 30 jyldyǵyna oraı ótkizilip otyr. Egemendikke qol jetkizgen jyldardan bastap elimizdegi tarıhı-mádenı oryndar qaıta túlep, qalpyna ıe bola bastady. Sonyń biri – Túrkistan qalasy. Konferensııaǵa qatysyp otyrǵan tarıhshy aǵalarymyzdyń eńbekteri qoryq-mýzeıdiń ǵylymı jumystarynyń jandanýyna da ólsheýsiz úles qosyp keldi. Osy baǵytta tarıhı oryndar men tulǵalarǵa arnalǵan kitaptar shyǵarylýda. Sonymen qatar, taǵy da bir qýanyshty jańalyq Qoja Ahmet Iаsaýı kesenesinde jerlengen tulǵalar tizimi jańaryp, taǵy da on eki tulǵanyń jerlengeni týraly tarıhı derekter maquldandy", dedi "Áziret Sultan" memlekettik tarıhı-mádenı qoryq-mýzeıiniń dırektory Nurbolat Ahmetjanov.
Basqosý barysynda kóne jáne jańa Túrkistannyń tarıhı damý sabaqtastyǵy, otyz jyl ishinde atqarylǵan jumystar, Elbasy Nursultan Nazarbaevtyń Túrkistan qalasyn damytý men tarıhı oryndardy qaıta jańǵyrtý jolyndaǵy serpindi isteri, ulttyq sana, Uly Dala eli uǵymynyń mazmuny, ortaǵasyrlyq qalalardyń zerttelýi men tarıhy, Qoja Ahmet Iаsaýı dúnıetanymynyń máni, arheologııalyq qazba jumystary barysyndaǵy ǵylymı jetistikter, tulǵalar tabanynyń izi qalǵan qasıetti jerdi tanytý baǵytynda eskerilýi tıis tarıhı derekter syndy kóptegen máseleler ortaǵa salynyp, baıandamalar oqyldy.
