Is-shara el Táýelsizdiginiń 30 jyldyǵy aıasynda uıymdastyrylyp otyr. Konferensııa Memleket basshysy Qasym-Jomart Toqaevtyń quttyqtaýymen ashyldy. QR Premer-mınıstriniń orynbasary Eraly Toǵjanov Memleket basshysynyń quttyqtaý sózin oqydy.
«Qurmetti konferensııaǵa qatysshylar! Búgin asa kórnekti ǵalym, akademık Salyq Zımanovtyń týǵanyna 100 jyl toldy. Búgin zań ǵylymy ǵana emes, búkil elimiz úshin aıtýly kún. Salyq Zımanuly táýelsiz Qazaqstannyń quqyqtyq negizderin qalyptastyrýǵa orasan zor eńbek sińirdi. Ol memlekettik, Egemendik týraly deklarasııany, Qazaqstan Respýblıkasynyń memlekettik táýelsizdigi týraly Konstıtýsııalyq zańdy – alǵashqy Ata Zańymyzdy ázirleýge at salysty. Sondaı-aq, Qazaqstandaǵy parlamentarızm ınstıtýtyn damytýǵa barynsha úles qosty. Áıgili ǵalym quqyq salasynyń qyr-syryna tereń boılap, taǵylymdy eńbekter jazyp qaldyrdy. Ásirese elimizdiń saıası jáne quqyqtyq damý tarıhy, bıler ınstıtýty sııaqty úlken taqyryptardy tereń zerttedi. Onyń mol murasy aldaǵy ýaqytta da el ıgiligine aınala beretini anyq», delingen Memleket basshysynyń quttyqtaý sózinde. Prezıdenttiń aıtýynsha, Salyq Zımanuly ulaǵatty ustaz retinde kóptegen bilikti zańgerler tárbıelep ósirdi.
«Onyń shákirtteri el ekonomıkasynyń túrli salasynda tabysty eńbek etip júr. Onyń mereıtoıy Táýelsizdigimizdiń 30 jyldyǵymen tuspa-tus kelip otyr. munyń sımvoldyq máni zor. Týǵan eline qaltqysyz qyzmet etken Salyq Zımanovtyń ǵıbratty ǵumyry jas urpaqqa árdaıym úlgi-ónege. Konferensııa jumysy tabysty bolsyn, egemendi elimiz órkendeı bersin!», deıdi Memleket basshysy. Is-shara aıasynda L.N. Gýmılev atyndaǵy EUÝ-dyń zań fakýltetinde akademık Salyq Zımanov atyndaǵy aýdıtorııanyń ashylýy ótip, ǵylymı eńbekteri men ómirbaıanynyń fotomaterıaldar kórmesi uıymdastyrylady.
