Qazirgi ýaqytta «Qaıyrymdy ister marafonyn» 60-tan astam ÚEU men bıznes ókilderi qoldady. Olardyń arasynda Samruk Kazyna Trust áleýmettik jobalardy damytý qory, «Vernyı kapıtal» kompanııalar toby, Qazaqstannyń Azamattyq Alıansy, ulttyq eriktiler jelisi, qazaqstandyq sportshylar odaǵy, «Qoǵamdyq mańyzy bar bastamalardy damytý Qory» QQ, «Altyn Qyran Foundation» QQ, «Aitas KZ» AQ, «Kar-Tel» JShS, «AstanaGaz» JShS, «Operator ROP» JShS, L.Gýmılev atyndaǵy EUÝ bar.
15-21 aqpan aralyǵynda «Qaıyrymdy ister marafony» aıasynda elimizdiń túkpir-túkpirinde 135 is-shara ótkizilip, 2000-nan astam adamǵa qoldaý kórsetildi.
Shyǵys Qazaqstan oblysynda eriktiler az qamtylǵan otbasylarǵa azyq-túlik sebetterin taratyp, qart adamdarǵa úıde kómek kórsetý úshin «Eshkim jalǵyz qalmaıdy» qaıyrymdylyq aksııalaryn ótkizdi.
Aqtóbe oblysynda «Qaıyrymdy ister marafony» aksııasy resmı túrde bastaldy. Qaıyrymdylyq marafony barysynda múmkindigi shekteýli 15 adam «Shıpager» saýyqtyrý ortalyǵynda emdelýge joldama aldy.
Volonterlik uıymdardyń basshylary Táýelsizdik qurdastarynyń atynan «Qaıyrymdy ister marafony» jalpyulttyq jobasyn qoldaýǵa shaqyrdy. Olar qıyn ómirlik jaǵdaıǵa tap bolǵan Q.Meıramǵalıdiń otbasyna 400 myń teńge somasynda sertıfıkat tabys etti. Bul qarajat turǵyn úı satyp alýǵa bastapqy jarna retinde paıdalanylatyn bolady.
Esterińizge sala keteıik, Qazaqstan Táýelsizdiginiń 30 jyldyǵy aıasynda Memleket basshysynyń bastamasymen «Qaıyrymdy ister marafony» jalpyulttyq jobasy bastaý aldy. Marafonǵa qatysýǵa barlyq qazaqstandyqtar, sonyń ishinde memlekettik jáne qoǵamdyq uıymdar, bıznes jáne JOO ókilderi shaqyryldy.
