Oblystyq polısııa departamenti kınologııa qyzmetiniń ortalyǵynda 25 qyzmettik izdestirý ıti bar eken. Olardyń arasynda nemistiń maqtaýly ovcharkasy, sondaı-aq, tuqymy táýir labrador-retrıverler de kezdesedi. Bulardyń barlyǵy kúshik kezinen jaqsylap tárbıelese, taptyrmaıtyn kómekshi. Erterekte jeti qazynanyń biri sanalatyn ıt ataýlyny ań qaǵýǵa, mal baǵýǵa paıdalansa, búgingi kúni qylmysty izdestirý, ashý baǵytynda da kádege jaratyp júr. Mamandar tarapynan jaqsy baǵa alyp júrgen qyzmettik ıttiń biri – Mýha. Qazir onnan astam tóbet. Boıyna bitken qasıettiń arqasynda áldeneshe qylmys ashqan.
– Ár ıttiń ózine tán jaratylysy, minezi bolady, – deıdi ıtbegi Oljas Seıitjanov, – máselen, Mýha maqtaǵandy jaqsy kóredi. Árbir operasııadan keıin tabanyn tazalap, kózi men tisin baıqap, baqylaý jasaımyz. О́tken jyly osyndaı ıtterdiń arqasynda 547 qylmys ashyldy. Esirtki zattaryna qatysty qyryqtan astam qylmystyń izi kesildi. Kóp-kórim kómek emes pe?
Qyzmettik ıtter tártip buzýshylarǵa da psıhologııalyq turǵydan áser etedi eken. Máselen, polısııa qyzmetkerlerine qarsylyq kórsetpek bolǵandarǵa nemese qylmys jasalǵan orynnan jaltaryp ketpek bolǵandardy azýyn aıǵa bilegen aıbarly ıtterdiń mysy bassa kerek. Osylaısha arnaıy kútilip baptalatyn qyzmettik ıtter tártip saqshylarynyń ıyǵyna túsetin júkti kóterisýde. Qylmysty ashý barysynda da sezimtal ıtterdiń septigi mol.
