«Qazaqstanda árbir kóktem aıtarlyqtaı sý tasqynymen qatar júredi. Ásirese aýyl halqy zardap shegedi. Bılik jyl saıyn tótenshe jaǵdaıǵa daıyndyq týraly esep beredi, biraq úlken sý kelgende, árqashan kúsh pen qarajat jetkiliksiz ári daıyndyq ta nashar bolyp shyǵady», dedi Muhtar Qul-Muhammed.
Ol sondaı-aq senatorlar ótken jyly sý qaýipsizdigi týraly Úkimet saǵatyn ótkizý kezinde sý tasqyny qaýpiniń aldyn alý jónindegi naqty sharalar usynǵanyn eske saldy.
Tótenshe jaǵdaılar mınıstri Iýrıı Ilın óz sózinde Mınıstrlik 2017 jyly ákimdiktermen birlese otyryp, kóktemgi sý tasqynyna asa beıim 905 eldi mekendi anyqtaǵanyn atap ótti. Búgingi kúni elimizdegi 315 eldi mekennen mundaı qaýip alynyp tastaldy jáne taǵy 314 eldi mekenge qaýip-qater barynsha azaıtyldy. Olarda 350 myńnan astam adam turatyn 70 myńnan astam turǵyn úı bar. Mınıstrdiń aıtýynsha, sheshilmegen máselelerdiń biri – sý sharýashylyǵy qurylystarynyń jaı-kúıi bolyp otyr. Osyndaı 500-ge jýyq gıdrotehnıkalyq qurylystar qazir jóndeýdi jáne jańǵyrtýdy talap etedi.
Kezdesý barysynda sharaǵa qatysýshylar sý tasqyny qaýpimen kúreske oń áser etetin birqatar naqty mindetterdi sheshý qajettigin atap ótti. Atap aıtqanda, sýdan qorǵaý aımaqtary men beldeýleri mańaıynda ornalasqan úıler men obektilerdiń sýda qalýyna jol bermeý úshin eldi mekender qurylysyn josparlaýdy jaqsartý asa mańyzdy. Joldardy jobalaý, salý, jańǵyrtý, jóndeý jáne paıdalaný kezinde tabıǵı-klımattyq faktorlar da eskerilgeni jón. Odan basqa, kóp salaly zertteýler júrgizilýi tıis jáne bógetterdiń qaýipsizdigi deklarasııasyn ázirleýdi qarjylandyrýdy bólý kerek.
