Bizdi mundaı oıǵa jetelegen Sýretshiler odaǵynyń múshesi Vıktor Keldiń «Tatıana» atty kartınasy. Avtor kúlli slavıan halqynyń sulýlyǵyn bir adamnyń boıyna syıdyrǵandaı. Qaraǵan jan qaıran qalary anyq. Siz de aınalyp óte almaısyz. Sebebi «Tatıananyń» názik jymıysy júrek tolqytyp, keýdeńe áldebir kúıdiń yrǵaǵyn ákeledi. Kóktem shyǵar deımiz ishimizden...
Qylqalam sheberi Týla oblysynda dúnıege kelgen. Alaıda onyń otbasy kóp uzamaı Selınogradqa kóship ketedi. 1969-1973 jyldary Smolensk pedagogıkalyq ınstıtýtynyń kórkemsýret-grafıka fakýltetinde oqý bitirgen soń, óziniń týǵan qalasyna qaıta oralady. Týlamen sýretshiniń bar ǵumyry bite qaınasyp jatyr.
Vıktor Kel ártúrli sıpatty sýretshi. Ol maıly boıaý, akrıl, akvarel, pastel, temper syndy túrli materıaldardy paıdalana otyryp, keskindememen jáne tasqa sýret salýmen aınalysady. Búginde keskindemeniń túrli janrlaryn damytýda. Peızaj ben portret onyń eń súıikti janrlary sanalady. Biz usynyp otyrǵan kartına – solardyń biri.
О́nerdegi eń uly taqyryp – áıel beınesi. Árbir qylqalam ıesi óz dáýiriniń sulýlyq ıdealyn salady. Onyń osy bir týyndysy ózine kóptegen sýretshiniń nazaryn aýdartty. Nege deseńiz, avtor keıipkeri retinde selınogradtyq sýretshi Tatıana Hohlovanyń beınesin alǵan. Kartınanyń bar qupııasy sonda jatqandaı.
Portrette kelbeti aıqyn, jumsaq júzdi, jymıysy súıkimdi, ıyǵyna túsken shashtary sarǵylt, kózderi meıirim nuryn shashqan arý beınelengen. Ol ózi taratyp turǵan qýanysh pen mahabbatqa qosylýǵa shaqyryp turǵandaı. Qyz oıdaǵy peızaj fonyna salynǵan. Naızaǵaı aldyndaǵy bult bolmasa kartınada kún kórinbeıdi. Alaıda qyzdyń boıynan tógilgen jaryq sáýleleri aınalaǵa shashyrap tur. Vıktor Kel bas mólsherine boıaýdy jalpaq jaǵý arqyly áıeldiń júzine jaryq beredi. Bul nurly jaryq bet kelbetiniń ásemdigi men moınynyń uzyn ári ádemi ekendigin áıgileıdi.
Kartına bir qaraǵanda qarapaıym-aq, alaıda tereń úńilseńiz shynaıy hám tabıǵı sulýlyqty kórýge bolady. Sýretshi naǵyz emosııany, sezimdi jetkize alǵan. Oǵan qarap turyp, Tatıanaǵa jaýap retinde ózińizde jymıǵyńyz keledi.
