Nurlan Nyǵmatýlınniń aıtýynsha, Reseıde qymbat metaldardy zańsyz satqandar 3-7 jylǵa deıin bas bostandyǵynan aıyrylady. Belarýste de zańsyz altyn izdeýshiler qylmystyq jaýapkershilikke tartylady.
Osy oraıda Májilis tóraǵasy Qazaqstanda tek ákimshilik jaýapkershilik qarastyrylǵanyn basa aıtty.
«Saldarynan qymbat baǵaly metaldardy urlaý deregi azaımaı otyr. Ol jyldan-jylǵa ósip keledi. Mysaly, «Qazaqaltyn» kásipornynda 2015-2020 jyldary 32 myńnan asa zańsyz altyn izdeýshiler anyqtalǵan. 2019 jyldyń aqpanynan 2020 jyldyń qyrkúıegine deıin osy kásiporyn 5 722 zańsyz altyn izdeýshini polısııaǵa tapsyrǵan. Onyń 80%-y qaıtadan zań buzǵan. Bul derek tek bir kásiporynǵa baılanysty», dedi Májilistiń jalpy otyrysynda.
Áıtkenmen, tómengi palatanyń spıkeri Nurlan Nyǵmatýlın Indýstrııa jáne ınfraqurylymdyq damý mınıstri Beıbit Atamqulovqa shúılikti.
Nurlan Nyǵmatýlınnyń aıtýynsha, mınıstrliktiń kimdi qoldap otyrǵany túsiniksiz.
«Beıbit Bákiruly, sizdiń jaýabyńyzdy estidim. Bul salada dekrımınalızasııa boldy. Alaıda ne mınıstrlik, ne úkimet bul qylmys úshin jazany qatańdatý týraly usynys bergen joq. Mınıstrlik kimniń jaǵynda? Siz kimdi qoldap otyrsyz? Otandyq kásiporynnyń aksıonerleri nemese zańsyz altyn izdep júrgendermen birgesiz be?», dedi Májilis tóraǵasy.
Osy tusta mınıstr Beıbit Atamqulov jazanyń jeńil, aıyppuldyń óte tómen bolýy saldarynan elimizde zańsyz altyn izdeýshilerdiń sany artqanyn moıyndady.
Májilis tóraǵasy Beıbit Atamqulovqa bul qylmys úshin jazany qatańdatý kerektigin aıtyp: «Siz neni kútip júrsiz? Nege uıyqtap otyrsyz? Indýstrııa jáne ınfraqurylymdyq damý mınıstrligi ýákiletti organ retinde qymbat metaldardyń zańsyz aınalymy úshin jazany kúsheıtýge múddeli bolýy kerek. Siz bul másele týraly aıtyp qoımaı, zańǵa túzetý engizý týraly bastama kóterýińiz qajet. Biz sizdi qoldaımyz», dedi ol.
Joǵaryda aıtylǵan usynysty Ishki ister vıse-mınıstri Alekseı Kalaıchıdı de qoldap, kelesideı pikirge toqtaldy.
«Siz durys aıtyp otyrsyz. Buryn Qylmystyq kodekstiń 210-baby boıynsha (qymbat metaldardy zańsyz satqandar – avtor) 7 jylǵa bas bostandyǵyna aıyrylatyn. Bul qylmys bolyp sanalatyn. Árıne, mundaı áreket úshin qylmystyq jaýapkershilikke tartýǵa bastamasy kóterilse, ony biz qoldaımyz», dedi Ishki ister vıse-mınıstri.
Sóz sońynda Indýstrııa jáne ınfraqurylymdyq damý mınıstri Beıbit Atamqulov tıisti zańdardy jiti qarap, oǵan túzetý engizý bastamasyn kóterýge ýáde etti.
