Komıtet Tóraıymy Aıgúl Quspannyń jetekshiligimen ótken otyrysqa Komıtet músheleri, QR Ishki ister mınıstri Erlan Turǵymbaev, Qarjy jáne Ulttyq ekonomıka vıse-mınıstrleri Tatıana Saveleva men Aıgúl Shaıymova, Ulttyq ulan Bas qolbasshysy Rýslan Jaqsylyqov jáne quqyqtyq tártip áskeriniń laýazymdyq tulǵalary qatysty.
Otyrysty ashqan Aıgúl Quspan Májilistiń profıldi Komıteti ulttyq qaýipsizdik pen qorǵanys qabiletin qamtamasyz etý máseleleri boıynsha elimizdiń kúshtik qurylymdarynda osy tektes basqosýlardy turaqty ótkizip turatynyn tilge tıek etti.
– Búgin Komıtet músheleri quqyqtyq tártip áskeriniń qyzmetimen tanysý maqsatynda Ulttyq ulanǵa arnaıy keldi. Osy kóshpeli otyrys aıasynda depýtattar tarapynan tıimdi praktıkalyq kómek kórsetý úshin qurylymnyń qazirgi jaǵdaıyn zerdelemekpiz, – deıdi Komıtet Tóraıymy.
Ishki ister mınıstri Erlan Turǵymbaev halyq qalaýlylaryna mańyzdy kezdesý úshin alǵys bildirip, Ulttyq ulannyń IIM-niń qurylymdyq bólinisi ekenin jáne negizgi mindeti qoǵamdyq tártip pen qaýipsizdikti qamtamasyz etý, strategııalyq nysandar men qylmystyq-atqarý júıesiniń mekemelerin kúzetý bolyp tabylatynyn aıtyp ótti.
Komıtet quramyn quqyqtyq tártip áskeriniń búgingi ahýalymen jáne damý perspektıvalarymen keńirek Ulttyq ulan Bas qolbasshysy general-leıtenant Rýslan Jaqsylyqov tanystyrdy.
Qarjy vıse-mınıstri Tatıana Saveleva Ulttyq ulandy respýblıkalyq bıýdjet sheńberinde materıaldyq qamtamasyz etý máselelerine toqtaldy.
Aıgúl Quspan Parlament Májilisiniń Halyqaralyq ister, qorǵanys jáne qaýipsizdik komıtetiniń kóshpeli otyrysyn qorytyndylaı kele, otyrys barysynda Ulttyq ulan qyzmetiniń máseleleri boıynsha tushymdy dıalog ornaǵanyn atap ótti.
– Otyrys qorytyndysy boıynsha biz tıisti usynymdar jobasyn ázirlep, jaqyn arada ony Úkimetke joldaıtyn bolamyz. Al óz tarapymyzdan, Komıtet depýtattary aldaǵy ýaqytta da Ulttyq ulan qyzmetine qatysty máselelerdi erekshe baqylaýda ustaıtynyn málimdeımiz, – dedi Komıtet Tóraıymy.
Ulttyq ulannyń jedel jáne arnaıy áskerı bólimderi men bólinisteri ishki ister organdarymen birlesip, elimizdiń 19 qalasynda qoǵamdyq tártipti qamtamasyz etetinin atap ótken jón.
Kún saıyn Ulttyq ulannan 5000-nan asa áskerı qyzmetshi IIM birge patrýldik qyzmet atqarýǵa jumyldyrylady.
Aǵymdaǵy jyldyń ózinde Ulttyq ulandyqtar eki myńnan asa quqyq buzýshyny quryqtap, ishki ister organdaryna jetkizdi. Quqyq buzýshylyqtardyń 90-nan astamy qylmystyq sıpatqa ıe. Áskerı jasaqtar kúshimen 10 sýyq jáne atý qarýy tárkilendi, sondaı-aq esirtki zattaryn tárkileýdiń 14 faktisi tirkeldi.
