Ǵalamat kóktemniń ıisi, kóńildiń hoshy ańqyǵan, náýirzekteı qusynyń tańdaıynda tamyljı «án» shalqyǵan bul kún – ardaqty áz-Naýryz! Ardaqty bolmaı qaıtsin, úsh myń jyl boıy úzbeı toılanyp, 300 mıllıon adamdy qýanyshyna ortaq etken ulyq tańnyń ulaǵaty qazaqqa az bolmasa kerek-ti.
Olaı deıtinimiz, álemdik kúntizbe aýysatyn qańtardyń birinshi kúninde jahannyń jalpaq jurtynan jyryla qalyp, «jylymnyń basy naýryz» dep siresip otyratyn taǵy biz – qazaq qoı. Sóıte júrip kóktemniń alǵashqy tańy atqanda «Mine, meniń Jańa jylym!» dep alty qurlyqqa aıqaılata jar salý da – tup-týra siz ben bizdiń mańdaıymyzǵa buıyrǵan mereı emes pe?!
Dál osy kúni, úlkenderdiń aıtýynsha, kún sáýlesi Jer sharynyń shyǵys bóliginde tańǵy saǵat altyda sebezgilep atqanda, bizdiń baıtaq dalada saǵattyń tili túngi úshtiń tóńireginde typyrshıdy eken. Mereke tańy bolyp atýǵa alaman kútken júırikteı asyǵyp. Sodan ba, álde tabıǵat júreginde qozǵalǵan seńniń bir uly daýysynan ba – tóńirek túgel tulpar tuıaǵynan ushqan túrli dybystardaı toǵysa quıqyljıtyndaı. Degbirsiz alaǵyzasyz. Erekshe elegizesiz. Osy sátti júrekpen sezip, kóńilmen keshseńiz, siz túrki topyraǵyna tógilgen ǵajap nur men dalany keze qydyratyn Qyzyr babanyń qudiretin sezinetindeısiz. Bala kóńilmen úlkender sózine uıyp, qarııa kóńilmen taǵatsyzdana kútetindeısiz. Sóıtip, bir ózgeshe kúıge oranǵan keıipker bolyp, dún-dúnıeniń qyzyǵyna tańǵalatyndaısyz! О́ıtkeni san ǵasyrlar boıy saqtalǵan qazaqy nanym-senim boıynsha bul túni Samarqannyń kók tasy da jibıdi delingen. Onyń sebebi, bir aıryqsha nur sol tasqa túsedi (ańyz). Osy sebepti de atam qazaq ataýly merekege oraı ataly sóz arnap, «Bul kúni Samarqannyń kók tasy da jibıdi, sender de++ jaqyndaryńa degen ókpe-renishten aıyǵyńdar. Kóńildegi muzdy eritińder», dep kópke kómegi kórneý ósıet aıtqan. «Kómegi» dep kóldeı etip aıtqanymyz sol – bul kúnde jurt qabaǵy jazylyp, júregi jumsap sala beredi sodan.
Ol ol ma, 22 naýryz qazaq úshin taǵy yrystyń, berekeniń, molshylyqtyń qazany burq-sarq qaınaǵan, tirliginiń bazary gúldeı jaınaǵan baıashat mezet syndy. Qasıetti kún. Aq túıeniń qarny jarylyp, aq ózenniń qursaýy qaıtqan kún dep sodan aıtady-aý, táıiri?! Tap osy tańnan, dáp osy kúnnen bastap tirshilikke tyń kúsh bitetindeı. Sosyn da bulqynyp jatqan bulaqqa baryp, kózin ashamyz, jas shybyqtyń ózine de asa bir mahabbatpen qaraımyz kelip. О́lsheýsiz mahabbat ta, meıirim-shapaǵat ta dál osy kúni árkimge násip bolardaı. Árbir jannyń boıy sondyqtan nurdan balqyrdaı kúı keshedi. Jer júziniń dúr silkinip, dúrııa kóılek kıgen arýdaı elite qalatyny, kóńildiń názik qylyn sherte qalatyny nesi eken deńizshi?!
Bálkim, sol úlkender aıtatyn: «Samalyq, samalyq, kók qus kózin ashty ma? Aıaǵyn jerge basty ma?..» dep keletin Naýryz jyryndaǵy álgi kók qus kóptiń kókireginen kóktem saıyn pyr-pyrlap ushar kókpeńbek kóńil qusy ma edi, kim bilgen?! Áıteýir, biz – Máńgilik eldiń egesi darqan qazaqtar Uly dala tósin dúrliktire osy merekeni toılaýda aldymyzǵa jan salǵan emespiz. Babadan mıras, atadan amanat bul dástúrdiń budan soń da úzilýi múmkin emes. Kerisinshe, ǵasyrdan-ǵasyrǵa dál búgingideı dańqy asyp dúrkireı bermek!
