Eki myń jyldan astam tarıhy bar kóne qalanyń basshysy barlyq turǵynnyń taza, jasyl jelekti jáne qaýipsiz qalada ómir súrgisi keletinin, shahardyń kórki men tazalyǵyn saqtaý qala ákimshiligine júktelgenimen, árbir sanaly azamat ózi turatyn ortanyń taza, ári qolaıly bolýyna úles qosýy kerektigin jetkizdi.
«Taraz kún saıyn kórkeıip, alleıalar men demalys oryndary kóbeıip keledi. Kógaldandyrý jumystaryna da mán berilip, jasyl jelekter men gúlder egiledi. Alaıda, Taraz qalasynyń ózine tán sáýleti men kelbetin jónsiz ilingen jarnamalar men zańsyz oryn tepken nysandar buzyp tur.
Osy oraıda, ákimdik qala sáýletin birkelki etýdi qolǵa alady. Sizderdi ǵımarattardyń syrty men jarnama quraldaryn ornalastyrǵanda birkelki úlgini ustanýǵa shaqyramyn. Qurylys kompanııalary men óńirdiń kásipkerleri jańadan salynyp jatqan nysandardyń kóriksiz qorshaýlaryn retke keltirgeni jón. Qalany jaıly etý úshin «qaqpasyz qala» qaǵıdasy negizinde mekeme syrtyndaǵy qaqpalar men qorshaýlar alynyp, sáýlettik joba boıynsha birizdilikke kóshiriledi. Týǵan qalasyna shyn janashyrlyq tanytatyn turǵyndar osy ıgi bastamalarǵa qoldaý bildirip, shahardyń shyraıyn ashýǵa óz úlesterin qosady degen senimdemin», delingen ákimniń úndeýinde.
Búginde Taraz qalasynyń sáýlettik kelbetin arttyrý, shaharǵa jaıly orta qalyptastyrý, jergilikti turǵyndardyń jaıly ómir súrýine jaǵdaı jasaý jumystary júrgizilýde. Qazirgi kezde oblys ortalyǵynda kóptegen nysandar salynyp, turǵyn úıler paıdalanýǵa berilýde. Sondaı-aq, aldaǵy ýaqyttarda da ákimdik tarapynan júzege asyrylatyn josparlar barshylyq.
