«Qala tazalyǵynda júrgen qyzmetkerlerge kómek bolsyn degen nıetpen ystyq shaı men ystyq baýyrsaq taratyp júrmiz. Bul sharanyń bári «Qaıyrymdy ister marafony» aıasynda ótip jatyr», dedi qalalyq Jastar saıasaty máseleleri basqarmasynyń bólim basshysy Aqulan Tastemir.
Elordalyq volonterler ystyq shaı men baýyrsaq taratyp qana qoımaı qar kúreý jumysyna da kómek kórsetti.
«Osyndaı qaıyrymdy ispen aınalysyp júrgen jastarǵa kóp rahmet. Aýa raıynyń sýyǵyna qaramaı kóshe tazalap, bes saǵattan beri qar kúredik. Eshqaıda shyǵa almaımyz. Sizderge rahmet, boıymyz jylyp, áldenip qaldyq», dedi qar kúrep júrgen qyzmetker Maqsut Kenje.
Sanıtarlyq qyzmetker Yrysty Nyǵymanova óz sózinde jurtshylyqty Naýryz meıramymen quttyqtap ótti.
Aıta keteıik, búgin qala kósheleriniń qaryn kúreýge eki myńǵa jýyq jol jumysshy men 1400-den astam tehnıka jumyldyryldy. О́tken táýlikte qaladan 100 myń tekshe metrden asa qar shyǵaryldy. Al elordaǵa qar jaýǵaly beri 4 637 884 tekshe metr qar shyǵaryldy.
