Negizinen Taraz elimizdegi jasyl jelekti qalanyń biri. Qazirgi kezde ekologııalyq máselelerdi sheshýde jáne kóne shahardyń eldegi eń jasyl qalalardyń biri retindegi tanymaldylyǵyn saqtap qalý maqsatynda tal egý jumystary belsendi túrde júzege asyrylýda. Aıtalyq, Ulystyń uly kúni qarsańynda oblys boıynsha 140 myń kóshet otyrǵyzylǵan. Al Taraz qalasyna qarasty «Baryshan», «Shóldala», «Taıvan» alqaptaryn, sondaı-aq qalanyń 13 jáne 15-shaǵyn aýdandaryn da kógaldandyrý jumystary uıymdastyryldy. Taraz qalasy ákiminiń orynbasary Ashat Esenalıevtiń aıtýynsha, jalpy 10 gektar aýmaqqa 12 myń kóshet egiledi dep josparlanǵan eken. Atalǵan jospar kóktemniń kókózek shaǵynda laıyqty júzege asýda. О́ńirde jasyl jelektendirý úrdisi «Táýelsizdigimizdiń 30 jyldyǵyna – 30 myń aǵash» aksııasy aıasynda júzege asyrylýda. Degenmen, osy jyly Taraz qalasynda 46 myń kóshet otyrǵyzylady.
Búgingi tańda oblys boıynsha 276,8 myń túp aǵash otyrǵyzylǵan. Onyń ishinde 88,5 myń túp qalalar men eldi mekenderde egilgen bolsa, 29,4 myń kóshet bilim berý uıymdarynda, al 159 myń sekseýil kósheti orman qory jerlerinde egilgen. Atalǵan aksııaǵa 53 myń jambyldyq qatysyp, aımaqty kógaldandyrýǵa óz úlesterin qosýda. Máselen, qaraaǵash, terek, týıa, boz arsha, shyrsha, qaraǵaı, jemis aǵashtary, tal aǵashy jáne qylqan japyraqtylar sııaqty jasyl ekpelerge búginde basymdyq berilip otyr. Bul rette qurǵaq aımaqtarda sekseýil aǵashtary da otyrǵyzylýda. Al onyń kóshetteri oblystyq tabıǵı resýrstar jáne tabıǵat paıdalanýdy retteý basqarmasyna qarasty orman sharýashylyǵy jáne janýarlar dúnıesin qorǵaý mekemeleriniń tálimbaǵynan jetkizilgen.
Sonymen qatar qala, aýdan aýmaqtaryndaǵy «Taza sý aıdyndary» aksııasy aıasynda da Aqkól, Bılikól kólderi men Talas ózeniniń boıyn, «Bógetkól» sý aıdyndaryn tazalaý jáne «Sý kózderin ashý, bulaqtardy tazartý» aksııasy aıasynda birqatar eldi meken tóńiregindegi sý nysandaryn, sý arnalaryn qoqystan tazartý jumystary da júrgizilýde.
Jambyl oblysy
