«1 sáýirden bastap birinshi synypqa qujattardy qabyldaý bastalyp, osy jyldyń 1 tamyzyna deıin jalǵasatynyn aıtyp ketkim keledi. Ata-analar qujattaryn «elektrondyq úkimet» portaly arqyly bere alady», deıdi Bilim basqarmasy basshysynyń orynbasary Baǵlan Smataeva.
Onyń aıtýynsha birinshi synypqa mynadaı qujattar qajet:
- ata-anadan ótinish;
- balanyń týý týraly kýáligi;
- densaýlyǵy jóninde anyqtama ( № 063/ý jáne № 026/ý-3 formasy)
- balanyń úshte tórt fotosy eki dana.
«Al erekshe bilimdi qajet etetin balalardy qabyldaý ata-anasynyń kelisimimen psıhologııalyq-medısınalyq-pedagogıkalyq konsýltasııanyń qorytyndysy negizinde júrgiziletinin atap ótkim keledi. Sondaı-aq sanıtarlyq normalardy saqtaı otyryp, mamandandyrylǵan bilim berý uıymdaryna konkýrstyq irikteý 1-20 maýsym aralyǵynda offlaın (testileý) rejıminde ótedi, al ótinishterdi qabyldaý 1 naýryz ben 15 sáýir aralyǵynda erejege sáıkes sáıkes ótetinin habarlaımyz», deıdi vedomstvo basshysynyń orynbasary.
Al qosymsha bilim berý uıymdarynda oqý prosesi ata-analardyń ótinishteriniń negizinde 10 adamnan aspaıtyn kezekshi toptarda saǵat 09:00-18:00-ge deıin aldyn ala jazylý boıynsha da jalǵasady.
«Jalpy bilim beretin mektepter janyndaǵy qosymsha bilim berý uıymdary fılıaldarynyń qyzmetine tyıym salyndy, fılıaldar tek jeke ornalasqan úı-jaılarda jumysyn jalǵastyrýda», dedi ol.
Sondaı-aq ata-analar barlyq sanıtarlyq normalardy qatań saqtaı otyryp, birinshi synypqa qujattardy qaǵaz túrinde usyna alady.
