Senatta búgin «Qazaqstan Respýblıkasynyń shekara saıasaty – normatıvtik quqyqtyq retteýdiń jaı-kúıi men perspektıvalary» taqyrybyna arnalǵan dóńgelek ústel ótti. Oǵan quqyq qorǵaý, ortalyq memlekettik jáne jergilikti atqarýshy organdardyń ókilderi qatysty.
«Shekara saıasaty memlekettiń syrtqy jáne ishki saıasatynyń bir bóligi. Sondyqtan ol eldiń ulttyq qaýipsizdiginiń quramdas bóligi sanalatyn shekara qaýipsizdigin qamtamasyz etýdiń tutas júıesin qurýǵa baǵyttalýy tıis», – dedi Muhtar Qul-Muhammed.
Kezdesý barysynda elimizde alǵash ret ázirlenip jatqan Shekara saıasatynyń tujyrymdamasy keńinen talqylandy. Onyń daıyndaý Qazaqstan Respýblıkasynyń shekara saıasaty salasynda júıeli, ǵylymı negizi bar ulttyq strategııanyń qajettiginen týyndap otyr. Senatorlardyń aıtýynsha, shekara saıasaty shekara mańyndaǵy eldi mekenderdiń áleýmettik-ekonomıkalyq damýyn jáne ondaǵy turǵyndardyń ál-aýqatyn jaqsartýdy qamtamasyz etý máselelerin de qamtýy kerek.
«Shekara saıasatynyń negizgi baǵyttary shekara mańyndaǵy aýmaqtardy áleýmettik-ekonomıkalyq damytý. Sondaı-aq, halyqtyń ál-aýqatyn arttyrý, memlekettik shekaralardy halyqaralyq-quqyqtyq resimdeýdi júzege asyrý, shekara yntymaqtastyǵyn damytý jáne shekara saıasaty salasynda ǵylymı bilim júıesin qalyptastyrý», – dedi Muhtar Qul-Muhammed.
Shekara saıasatynyń tujyrymdamasyn ázirleýdiń maqsaty shekara qaýipsizdigin qamtamasyz etýdiń negizgi baǵyttary, shekara salasyndaǵy ulttyq múddelerdi iske asyrý, memleketaralyq shekara yntymaqtastyǵyn damytý jáne nyǵaıtý, memlekettik shekaranyń tutastyǵyna qol suǵýshylyqtyń aldyn alý jáne jolyn kesý boıynsha resmı kózqarastardy qalyptastyrý bolyp tabylady. Otyrys barysynda syrtqy jáne ishki kóshi-qon, shekara aımaǵyndaǵy qoǵamdyq qaýipsizdikti qamtamasyz etý, memlekettik shekarada ótkizý pýnktteriniń ınfraqurylymyn qurý jáne damytý máseleleri talqylandy.
