Byltyr 15 qarashada Valentın Býtenko kisi qolynan qaza tapqan bolatyn. Er adam sol kúni tańerteń túngi aýysymnan úıine qaıtyp kele jatqan. Maıqudyq shaǵynaýdanyndaǵy 11A úıinin kireberisinde kórshisi oǵan kútpegen jerden pyshaqpen shabýyl jasap, uıqy arterııasyn kesip jibergen. Sarapshylar jábirlenýshiniń denesinde 17 pyshaq jaraqaty baryn anyqtady. Er adam áıeliniń qolynda qaıtys boldy. Áıeli kúıeýiniń daýysyn estigende podezge júgirip shyqqan kórinedi.
«Meniń kúıeýim qansyrap, maǵan birdeńe aıtqysy keldi, biraq aıta almady. Kórshimiz qasymyzda turyp, kúıeýimniń túnde ápkesin zorlaǵanyn qaıtalaýmen boldy. Men qandy toqtatýǵa tyrystym, biraq qolymnan kelmedi. Jedel járdem kelgenge deıin ol kóz jumdy», dep eske alady marqumnyń áıeli Marına Egorova.
Valentın Býtenko
Sotta aıǵaqtaryn ózgertken kúdikti aradaǵy janjal kúndelikti ómir negizinde bolǵanyn málimdedi. Aıtýynsha, kórshisiniń joǵaryda ornalasqan páterinen jıi sý aǵyp, úıde shýly jıyndar uıymdastyrǵan. Alaıda onyń sózderiniń durystyǵyna eshkim kýálik etpedi. Tergeý barysynda onyń ápkelerinen de jaýap alyndy. Olardyń eshqaısysy zorlaý nusqasyn rastaǵan joq.
Er adamnyń minez-qulqyndaǵy barlyq oǵashtyqtarǵa qaramastan, sarapshylar onyń boıynda psıhıkalyq aýytqýlar joq degen uıǵarymǵa kelgen. Kerisinshe, sotta onyń kisi óltirýge daıyndalyp, qurbanyn terezeden qarap kútip júrgeni anyqtaldy.
«Onyń qanynan eshqandaı esirtki nemese alkogol tabylǵan joq. Iаǵnı ol ne istep jatqanyn túsingen. Munyń bárin eske túsirý bizge qıyn. Qyzym ekeýmiz áli kúnge deıin óz-ózimizge kele alar emespiz. Qyzyma psıhologtar kómektesýde», deıdi marqumnyń joldasy.
Qylmystyq is Qaraǵandy oblysynyń qylmystyq ister jónindegi mamandandyrylǵan aýdanaralyq sotynda qaraldy. Sottalýshy Qazaqstan Respýblıkasy Qylmystyq kodeksiniń «Adam óltirý» 99-baby 1-bóligi boıynsha kináli dep tanylyp, jazasyn qatań rejımdegi kolonııada óteý úshin 9 jylǵa bas bostandyǵynan aıyryldy.
