Májiliste jer qatynastaryna qatysty zań jobasy I oqylymda maquldandy

Memleket basshysy Q.Toqaevtyń zań shyǵarý bastamasy tártibimen daıyndalǵan bul qujatty qabyldaýdyń maqsaty – sheteldikterdiń, azamattyǵy joq adamdardyń, sheteldik zańdy tulǵalardyń, sheteldik qatysatyn Qazaqstan Respýblıkasy zańdy tulǵalarynyń, halyqaralyq uıymdardyń, halyqaralyq qatysatyn ǵylymı ortalyqtardyń, sondaı-aq aýyl sharýashylyǵy maqsatyndaǵy jer ýchaskelerin jeke menshik quqyǵymen jáne ýaqytsha jer paıdalaný quqyǵymen qandastardyń ıelenýine tyıym salýdy engizý.

Osyǵan saı, jalpy otyrysta Nurlan Nyǵmatýlın: -Búgingi maquldanyp otyrǵan jer qatynastary týraly zań jobasynyń Qazaqstan qoǵamynda mańyzy da, orny da erekshe. Sebebi, Memleket Basshysy Qasym-Jomart Kemeluly Toqaevtyń tapsyrmasymen ázirlengen osy qujattyń nátıjesinde halqymyzdyń nazarynda júrgen suraq boıynsha naqty sheshim qabyldandy. Endi jerimizdi sheteldikterge satýǵa da, jalǵa berýge de tolyqtaı tyıym salynady, - dedi. Sonymen qatar, Nurlan Nyǵmatýlın bul zań jobasy jer týraly túrli pikirlerdi toqtatyp, aldaǵy ýaqytta jerdi qoldaný múmkindikterin tıimdi paıdalanýǵa jol ashatynyna nazar aýdardy. 

Aıta ketý kerek, jer zańnamasynan sheteldik jer paıdalanýshylarǵa jáne sheteldik qatysý úlesi bar birlesken kásiporyndarǵa, sondaı-aq qandastarǵa aýyl sharýashylyǵy jerlerine quqyqtar berý máselelerin reglamentteıtin quqyqtyń materıaldyq normalary alyp tastalmaq. Bul rette, 2016 jylǵy 1 shildege deıin joǵaryda atalǵan jer paıdalanýshylarǵa jalǵa berý shartymen berilgen aýyl sharýashylyǵy maqsatyndaǵy jer ýchaskelerine ýaqytsha jer paıdalaný quqyǵy jalǵa alý shartynyń qoldanylý merzimi aıaqtalǵanǵa deıin qoldanylatyny jáne uzartylýǵa jatpaıtyny kózdelgen.

Sonymen qatar, jalpy otyrysta «Erekshe taýarlardy baqylaý týraly» zań jobasy men oǵan ilespe zań joba I oqylymda maquldandy.

Zań jobasynda erekshe taýarlardy baqylaýdyń maqsattary, qaǵıdattary men ádisteri belgilengen. Qujattyń maqsaty – ulttyq qaýipsizdikti qamtamasyz etý, jappaı qyryp-joıý qarýyn taratpaý jáne qarý-jaraqtyń zańsyz saýdasyna jol bermeý jónindegi halyqaralyq mindettemelerdi saqtaý. Otyrys barysynda depýtattar taýarlar men qyzmetterdi zańsyz ımporttaýǵa baılanysty jaýapkershilik engizýdi usyndy.

- Menińshe, depýtattardyń jumys toptarynda engizgen túzetýleri mańyzdy jáne ózekti. Eger atalǵan másele boıynsha Úkimettiń nusqasyn basshylyqqa alatyn bolsaq, onda bizdiń shekaramyz arqyly kez-kelgen tasymal tehnologııalarǵa, ǵylymı-tehnıkalyq qujattamalarǵa baǵdarlamalyq qamtamasyz etýge tyıym salynǵan. Alaıda, Qylmystyq Kodekstiń 275-babyna sáıkes, tek qana zańsyz eksportqa jaza qoldanylady. Sondyqtan, depýtattar tek zańsyz eksportqa ǵana emes, sonymen qatar erekshe taýarlardyń zańsyz ımporty úshin de jaza belgileý týraly ońtaıly usynys engizdi dep esepteımin, - dedi Nurlan Nyǵmatýlın.

Aıta ketý kerek, zań jobasy erekshe taýarlardyń eksportyn, keri eksportyn, ımportyn, tranzıtin, eksaýmaqtyq keri eksportyn, eksaýmaqtyq deldaldyq qyzmetter kórsetýdi nemese tehnıkalyq kómekti júzege asyrý kezindegi qatynastardy retteýge baǵyttalǵan. Jalpy otyrysta Májilis komıtetteri birshama jańa zań jobalaryn jumysqa aldy. Olar Saılaý týraly Konstıtýsııalyq zań jobasyna túzetýler engizý, Áleýmettik kásipkerlikti damytý máselelerine qatysty zań jobasy men Salyq kodeksine qatysty zań jobasy bar.

Sonymen qatar, depýtattar Qazaqstan Respýblıkasynyń keıbir zańnamalyq aktilerine advokattyq qyzmet jáne zań kómegi máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasy boıynsha Qazaqstan Respýblıkasy Parlamentiniń Májilisi men Senaty arasyndaǵy kelispeýshilikti eńserý jónindegi kelisim komıssııasynyń usynysymen kelisti.

Otyrys sońynda Májilis depýtattary memlekettik organdar basshylaryna depýtattyq saýaldar joldady. Olar: Ǵ. Eleýov, S. Naqpaev, D. Nurmanbetova, G. Nurymova, D.Esbaeva, A.Perýashev, F.Kamenov, A.Qońyrov, Ǵ.Qulahmetov, A.Sqaqova, V.Nábıev.
Qazaqstan Respýblıkasy Parlamentiniń Májilisi