Qostanaı oblysyndaǵy keıbir memlekettik organdarda sybaılas jemqorlyq táýekelderi anyq baıqalady. Alaıda jaýapty oryndar mundaı faktilerdi anyqtap, áshkereleýge enjarlyq tanytyp otyr. Bul týraly oblys ákimdiginde ótken jemqorlyqqa qarsy is-qımyl máseleleri jónindegi komıssııa otyrysynda óńirge jumys saparymen kelgen Sybaılas jemqorlyqqa qarsy is-qımyl agenttigi tóraǵasynyń keńesshisi Jazıra Jylqyshıeva málim etti.
Agenttik tóraǵasy keńesshisiniń aıtýynsha, keıbir óńirlerde ishki taldaýlar júrgizý barysynda birde-bir sybaılas jemqorlyq táýekeli anyqtalmaǵan.
- Bul eń aldymen atalǵan memlekettik organdardyń jemqorlyq táýekelderin joıýǵa salǵyrt qarap otyrǵandyǵyn jáne birinshi basshylar men jergilikti ákimderdiń jaýapkershilik deńgeıiniń tómendigin kórsetedi, - dedi J. Jylqyshıeva.
Tóraǵa keńesshisi sybaılas jemqorlyqqa qarsy zańnamadaǵy jańa normalarda jemqorlyqqa jol ashatyn jaǵdaılarǵa salǵyrt qaraǵan sheneýnikterdi jaýapkershilikke tartý qarastyrylǵanyn sóz etti.
- Jańa normalar boıynsha birinshi basshylar qaramaǵyndaǵylardyń sybaılas jemqorlyqqa barǵany úshin ǵana emes, sonymen qatar ózi basqaryp otyrǵan memlekettik organdaǵy sybaılas jemqorlyqqa qatysy bar quqyq buzýshylyqtardyń beleń alǵany úshin de jaýapkershilikke tartylady. Mundaı faktilerdi boldyrmaý úshin jappaı aldyn alýdy, sondaı-aq sybaılas jemqorlyq táýekelderine ishki taldaý júrgizýdi barynsha kúsheıtý kerek, - dedi Agenttik tóraǵasynyń keńesshisi.
Sonymen qatar, atalmysh komıssııanyń otyrysynda memlekettik organdardyń sybaılas jemqorlyqqa qarsy strategııany iske asyrý jónindegi josparlardyń oryndalý sapasy talqylandy. Oblystaǵy arnaıy monıtorıngtik toptyń jetekshisi Dınara О́tebaevanyń aıtýynsha, óńirde bul baǵytta júzege asyrylyp jatqan jumystardyń sany bar bolǵanymen, sapasy máz emes.
Jıyn sońynda oblys ákimi Arhımed Muhambetov memlekettik organdardyń sybaılas jemqorlyqtyń aldyn alý boıynsha jumysyn kúsheıtý qajettigine toqtalyp, barlyq deńgeıdegi basshylarǵa joǵaryda atalǵan kemshilikterdi qysqa merzim ishinde joıý kerektigin jáne sybaılas jemqorlyqtyń aldyn alý jumystaryn kúsheıtý boıynsha sharalar keshenin ázirleýdi tapsyrdy.
- Jergilikti atqarýshy organdar Qazaqstan Respýblıkasynyń 2015-2025 jyldarǵa arnalǵan sybaılas jemqorlyqqa qarsy strategııasy aıasyndaǵy is-sharalar josparyn júzege asyrý jumystaryn júıeli jalǵastyrýda. Bul baǵyttaǵy jospar 43 tarmaqty qamtıdy. Búginde memlekettik qyzmet kórsetýdi sıfrlandyrý sybaılas jemqorlyqqa qarsy qyzmettiń negizgi baǵyttarynyń biri bolyp tabylady. Máselen, 2020 jyly «Adaldyq alańy» jobasy boıynsha memlekettik qyzmetterdi sıfrlandyrý deńgeıi 90%-ǵa, halyqaralyq standart boıynsha 92%-ǵa jetkenin atap ótkim keledi. Qazaqstan Respýblıkasynyń 2015-2025 jyldarǵa arnalǵan sybaılas jemqorlyqqa qarsy strategııasynyń is-sharalar josparyn iske asyrý aıasyndaǵy jumystardy jalǵastyrýdy tapsyramyn, - dedi óńir basshysy.
Qostanaı oblysyna 12 sáýirde jumys saparymen kelgen Sybaılas jemqorlyqqa qarsy is-qımyl agenttigi tóraǵasynyń orynbasary Dmıtrıı Malahov bastaǵan jumys toby tórt kún boıy óńirdi aralap, aýqymdy túsindirý jumystaryn júrgizedi. Sapar barysynda jurtshylyqpen, ujymdarmen kezdesý, azamattardy qabyldaý josparlanǵan. Jumys qorytyndysy boıynsha memlekettik organdar men qoǵamdyq uıymdardyń sybaılas jemqorlyqtyń aldyn alý jónindegi qyzmetin jetildirý jóninde usynymdar ázirlenetin bolady.
Qostanaı oblysy
