Ekologııa • 15 Sáýir, 2021

Qazaqstanda keń aýqymdy «Kıik» aksııasy bastaldy

24 ret kórsetildi

15 sáýir men 15 mamyry aralyǵynda elimizdiń 12 oblysynda keń aýqymdy «Kıik» tabıǵatty qorǵaý aksııasy ótedi. Is-sharanyń bastamashylary Ekologııa, geologııa jáne tabıǵı resýrstar, Ishki ister mınıstrlikteri jáne Ulttyq qaýipsizdik komıteti. Taraptar ««Kıik» tabıǵatty qorǵaý aksııasyn ótkizý týraly» birlesken buıryqqa qol qoıdy, dep habarlaıdy Egemen.kz mınıstrliktiń baspasóz qyzmetine silteme jasap.

Aksııanyń maqsaty laktasııa kezeńinde kıikterdi qorǵaýdy kúsheıtý, sondaı-aq el aýmaǵynda tabıǵatty qorǵaý zańnamasyn buzýdyń jolyn kesý boıynsha birlesken is-sharalardy uıymdastyrý bolyp tabylady.

Buıryq sheńberinde aksııany ótkizý kezinde quqyq qorǵaý jáne tabıǵat qorǵaý organdarynyń ózara is-qımyly jónindegi úılestirý shtaby, sondaı-aq birlesken is-qımyl jospary bekitildi.

Aksııa barysynda quqyq qorǵaý organdarymen birlesip kıik múıizderiniń zańsyz aınalymyna qarsy is-qımyl jáne olardy elden tys jerlerge shyǵarý boıynsha sharalar kúsheıtiletin bolady.

Osy aýqymdy is-sharaǵa 200-ge jýyq ınspektordan turatyn mobıldi toptar, 64 birlik joǵary ótimdi avtomashınalar, "Ohotzooprom "О́B" RMQK-nyń 12 «KÝNG»-tary, "Qazavıaqutqarý" AQ tikushaqtary, sondaı-aq Ekologııa mınıstrligi Orman sharýashylyǵy jáne janýarlar dúnıesi komıtetiniń aýmaqtyq bólimsheleriniń, quqyq qorǵaý organdary men Shekara qyzmetiniń qyzmetkerleri jumyldyryldy.

Aıta ketý kerek, 2019 jyly brakonerlik úshin zańnamany qatańdatý úshin QR Qylmystyq kodeksine ózgerister engizildi, oǵan sáıkes zańsyz ań alaǵany úshin 12 jylǵa deıingi merzimge bas bostandyǵynan aıyrýǵa jáne múlkin tárkileýge deıin qatań jazalar kózdelgen.

Budan basqa, kıikterdiń sanyn saqtaý jáne ulǵaıtý maqsatynda 2020 jyly Ekologııa mınıstrligi ǵylymı maqsattarda paıdalanýdan basqa, Qazaqstannyń búkil aýmaǵynda kıikterdi, olardyń bólikteri men derıvattaryn 2023 jylǵa deıin paıdalanýǵa tyıym saldy.

Sonymen qatar ótken jyldardaǵy tabıǵatty qorǵaý is-sharalarynyń nátıjeleri aqbókenniń múıizderin zańsyz óndirýge suranys áli de joǵary ekenin kórsetedi. 2020 jyly Ekologııa mınıstrligi Orman sharýashylyǵy jáne janýarlar dúnıesi komıtetiniń ınspektorlary kıikke brakonerliktiń 85 faktisin anyqtady. Nátıjesinde 727 ushany jáne 3 489 kıik múıizi tárkilenip, jalpy shyǵyn 2,4 mlrd.teńgeni qurady.

Sońǵy jańalyqtar

Almaty qalasynda jer silkindi

Aımaqtar • Keshe

Uqsas jańalyqtar