Bul oılar sýretshi hám keskindemeshi Ashat Dinikeevtiń «Qyz qýý» týyndysyn kórgende sanamyzǵa uıa saldy. Kartına ishinde jigittiń batyldyǵy men qyzdyń uıańdyǵy bar. Bizdi eliktirgeni sol názik sezim. Avtor kenep betine ultqa tán boıaýdy tókken. Kartınany jazý barysynda baba saltyn basty ustanymy etkeni anyq kórinip tur.
«Qyz qýý» kartınasy 2001 jyly jaryqqa shyqqan. Onyń eń basty ereksheligi avtorlyq derbes mánermen oryndalǵan. Shyǵarmada keńistik pen alýan pishinder tutasyp, sándik úshin sheber oıýlasqan áshekeıler kompozısııanyń túpki mánin mazmundap tur. Qylqalam sheberiniń qııalyna qanat bitirgen shyǵarmashylyq derbestik te baıqalady.
Kartına «Qyz qýý» sıýjetiniń varıasııasy retinde jazylǵan. Biriniń ústine biri jaıylǵan oıý-órnekti tórt buryshtan turatyn kartınada mıftik kentavrlarsha shıraq qımyldy boıjetken men bozbalanyń mánerli pishinderi beınelengen. Kentavr – sýretshiniń súıikti ári «fırmalyq» beınesi. Ol avtordyń kóptegen týyndysynda kezdesedi.
Jalpy, qyz qýý – erteden kele jatqan at oıyny. Bul jarys óziniń túri jaǵynan bizdiń zamanymyzǵa deıin qandaı bolsa, qazir de sol kúıinde qaldy. Baǵzy zamanda jarys jigit pen onyń qalyńdyǵy arasynda ótkizilgen. Eger jigit jarysta jeńilse, ol ózine qoıylǵan talapty aqtaı almaǵany úshin qyzben nekelesý quqynan aıyrylǵan. Bul sııaqty eski ádet áldeqashan umyt boldy. Qazirgi qyz qýý óziniń ıdeıalyq mazmuny jaǵynan ult mádenıetine engen halyqtyq sport túrleriniń qaı-qaısysynan bolsa da kem túspeıdi.
Ashat Dinikeevtiń kartınalarynan shynaıy jáne fantastıkalyq, birsáttik jáne máńgilik, pendelik jáne páktik týraly shaǵyn ósıetterdi «oqýǵa» bolady.
