Qazaqstan WorldSkills baǵdarlamasyna 2014 jyly qatysyp, WSI-niń 70-shi múshesi atandy. Az ýaqyttyń ishinde qazaqstandyq stýdentter álemdik chempıonattarda jaqsy nátıjeler kórsetti.
«WorldSkills qozǵalysyna biz jetinshi jyl qatarynan qatysyp kelemiz. Osy ýaqyt ishinde Qazaqstan 50-orynnan 14-orynǵa deıin kóterildi. 2019 jyly bizdiń stýdentter jalpykomandalyq esepte 63 qatysýshy eldiń arasynda 14-shi orynǵa ıe bolǵanyn esterińizge sala keteıin. Bul - jaqsy nátıje. Qazaqstan jumysshy mamandardy daıarlaý salasyndaǵy úzdik praktıkalardyń benchmarkıngi úshin bul qozǵalysty odan ári damytatyn bolady. Atap aıtqanda, biz WorldSkills standarttaryn oqý prosesine engizip, kolledjderde demonstrasııalyq emtıhandardy ótkizemiz. Sondaı-aq sarapshylardy oqytý jáne sertıfıkattaý boıynsha jumysty uıymdastyramyz», dedi Bilim jáne ǵylym vıse-mınıstri Sholpan Karınova.
2020 jyly WorldSkills standarttary boıynsha demonstrasııalyq emtıhan ótkizý boıynsha usynystar ázirlenip, elimizdiń 36 kolledjine emtıhannyń demo-nusqasyn engizý bastaldy. Sonymen birge ótken jyly WorldSkills Qamqorshylyq keńesi quryldy. AgroSkills, Kazakhmys korporatıvtik chempıonaty jáne basqa da salalyq baǵyttar bıznestiń qatysýymen jetildirip keledi.
WorldSkills – bul jumysshy mamandyqtary boıynsha kadrlardy daıarlaý sapasyn arttyrýǵa jáne olardy jastar arasynda tanymal etýge baǵyttalǵan halyqaralyq qozǵalys.
