Kókpar – ulttyq minez

Kóńilge oı salǵan «Kókpar» kartınasy. Shyǵarmanyń ıesi Qazaqstan Sýretshiler oda­ǵynyń múshesi Abaı Chýn­cha­lınov. Qylqalam sheberi at jarysy, tartys pen doda birigip ketken qazaq halqynyń ulttyq oıyny kókpardy beıneleýge tyrysqan.

 Kóshpendiler myńdaǵan jyldar boıy kókpar tartý arqyly minezderin shyń­daǵan jáne qaısar jaýyn­ger ári sheber shabandoz re­tinde óz daǵ­dylaryn jetil­dirgen. Baǵzy zoroastrızm zamanynan belgili bul at oıyny qazaqtardyń ǵana emes, qyrǵyz, tájik, ózbek jáne Or­talyq Azııanyń ózge de h­alyqtarynyń arasynda da keń taralǵan.

Biz kartınadan árbir adam shoǵyr­lanǵan energııanyń jıyntyǵy re­tinde kórinetin jartylaı jalańash sha­ban­dozdardy kóremiz. Olardyń atta­ry aıqysh-uıqysh birlesip ketken. Kúrdeli burylystar qısaıyp ketken bet-álpeti, oı­yn­shylardyń shıryqqan bulshyq etteri, attardyń uıpa-tuıpa bolǵan jal-quıryǵy, adyraıǵan kózderi, olar­dyń qozǵalysyndaǵy jankeshtilik, mine, osylardyń barlyǵy basty syı «serke» úshin kúreste keri sheginýdiń múm­kin emestigin dáleldeıdi. Sheńberge tuıyqtalǵan kompozısııa shabandozdardy biriktiredi.

Olardyń qozǵalysy ser­keniń aınalasyna qurylǵan. Birinshi plandaǵy qara tul­parǵa mingen shabandoz sheń­ber kompozısııasyn azdap buzyp tur, alaıda onyń ózi kompozısııaǵa qozǵalys qosyp tur. Erkin beıneli túster ma­ńyzdy element sanalady. Boıaý­lardyń jalpaq, shıraq jaǵylýy aldy-artyn orap ala­tyn qozǵalystyń ajyramas bóligine aınalady. Týyndy shapshań qozǵalysty, muny dóńes jazyq pen qalyqtap ushyp bara jatqan aq bulttar da bildiredi.

Kókpar – ulttyń minezi. Avtor shy­ǵarmasy arqyly osyny dáleldeıdi. Úı irgesinen dúbirletip attar ótse qany týlap, kermedegi tulparyna turman sala­tyn qazaqtyń bitim-bolmysy, minez-qal­py osy oıynda jatyr. Kartına sony aıǵaq­tap turǵandaı.