Belgili bolǵandaı, búgin saǵat 11.16-da «102» pýltine «Qazaqstan» SK mańyndaǵy kópirden bir qyzdyń ózenge sekirgeni týraly habarlama kelip túsken. Oqıǵa kezinde jaqyn mańda bolǵan 38 jastaǵy Denıs Sındeev sýdaǵy qyzǵa kómek kórsetip úlgergen.
«Men sol mańda turǵanmyn. Bir kezde adamdar qyzdyń sýǵa sekirgenin aıtyp shýlap jatty. Jaqyndap qaraǵanda sý betinde jantalasyp jatqan boıjetkendi kórdim. Oılanbastan syrt kıimimdi sheship, ózenge sekirip, qyzdy jaǵaǵa shyǵardym», dedi elordalyq turǵyn.
Dárigerlerdiń aıtýynsha, qazir qyzdyń ómirine eshqandaı qaýip joq. Oqıǵanyń mán-jaıyn polıseıler anyqtap jatyr.
«Nur-Sultan qalasynyń polısııa departamentiniń basshysy Erjan Sádenov Denıs Sındeevke eren eńbegi úshin alǵys aıtyp, Alǵys hat pen baǵaly syılyq tabys etti», delingen qalalyq Polısııa departamentiniń habarlamasynda.
