Qoǵam • 23 Sáýir, 2021

Aqtóbede «jol jyry» qaıta bastaldy

46 ret kórsetildi

Osy aptada Prezıdent Q.Toqaev avtokólik joldarynyń sapasyn baqylaýdy bosańsytyp alǵany úshin Indýstrııa jáne ınfraqurylymdyq damý mınıstrligi Avtomobıl joldary komıtetiniń tóraǵasy S.Barmaqovty jáne Batys Qazaqstan, Soltústik Qazaqstan jáne Aqtóbe oblystary ákimderiniń orynbasarlary T.Shákimov, I.Týrkov jáne N.Qalaýovty qyzmetterinen bosatty. Atyraý oblysynyń áleýmettik-ekonomıkalyq damý esebin tyńdaǵan Prezıdent Úkimet, ákimder, quqyq qorǵaý organdaryna bıýdjet qarjysyn tıimsiz jumsaýdyń aldyn alyp, keleńsizdikterdi joıyp, jol qurylysyndaǵy standarttardyń saqtalýyna baqylaýdy kúsheıtýdi taǵy tapsyrdy.

Aqtóbelikter byltyrdan beri kovıdpen kúreste belsendilik tanytyp júrgen, turǵyndardyń aryz-shaǵymdaryna erekshe yjdaǵattylyqpen jaýap beretin Nurjaýǵan Qalaýovtyń qyzmetinen ketýine alańdaýshylyq bildirgeni ras.

Aqtóbe oblysynyń avtokólik joldarynyń uzyndyǵy – 6 854,6 shaqyrym bolsa, onyń 1 892 shaqyrymy – respýblıkalyq, 1262,8 shaqyrymy – oblystyq jáne 3699,8 shaqyrymy aýdanaralyq joldar sanatynda. О́ńirdegi ortasha ne qanaǵattanarlyq jaǵdaıdaǵy jergilikti joldar úlesi 56%-ǵa teń nemese 2 829,3 shaqyrym. Degenmen qala joldarynyń qalaı jóndelgenine jylda kóktemde tabıǵat qana ádil baǵasyn berip keledi. Kóktemdegi qar sýymen birge úgitilgen asfalt jamylǵylary jol merdigerleriniń jumysyna berilgen syn-eskertpe bolsa da, qarmen birge aqqan bıýdjet qarjysyn ornyna qoıýdy eshkim qadaǵalap otyrǵan joq.

Byltyr Aqtóbe qalasynda 117 kóshege ortasha jáne kúrdeli jóndeý júrgizip, bıyl 50 kósheniń kólik joldaryn jarqyratamyz dep belsene kirisken Aqtóbe qalasynyń ákimi Ashat Shaharov qala joldarynyń tez «erip ketý» sebebin túsindire almady. Naýryzdyń sońynde qala turǵyndarynyń áleýmettik jelidegi ashý-yzalary artqanda, óńir basshysy Ońdasyn Orazalın «Aqtóbe oblystyq jolaýshylar kóligi jáne avtomobıl joldary» MM-i basshysy Málimet Ibrashevti qyzmetinen bosattyp qutyldy. Alaıda jol qurylysyna jaýapty tulǵalar jyldam oryn aýystyryp, jaýaptan tez qutylyp ketip júr. A.Shaharov Aqtóbe qalasynyń «Nur-Sıtı» shaǵyn aýdanynynda kólik jolyn salǵan seriktestik basshysyna jurt kózinshe ursyp qana jurttyń nazaryn basqaǵa aýdarǵandaı boldy. Jol tegisteıtin birde-bir aýyr tehnıkasy joq seriktestiktiń qala qurylysy jolynda tenderdi qalaı utyp alǵany suraq kúıinde qaldy. Naýryz týa shuryq tesik, oıdym-oıdym joldar kópshilik kóliginiń dóńgelegin tesip, bamperlerin jardy. Kólikteri jolda qıraǵan júrgizýshilerdiń aryzdarymen kelgen polısııa departamenti mamandary aıyppul paraqtaryn toltyrýdan da aıanyp qalǵan joq. Qıraǵan joldar úshin qalalyq ákimshilik aıyppul tóledi. Polısııa departamentiniń Ákimshilik polısııasy qyzmetkerleri «Aqtóbe oblystyq jolaýshylar kóligi jáne avtomobıl joldary» MM-i mamandarymen birlese oblystyq mańyzy bar «Aqtóbe – Rodnıkovka – Mártók», «Aqtóbe – Bolgarka – Shubarqudyq» avtokólik jolynyń sapasyn tekserip, aıyppul saldy. Joldyń sapasyn baqylaý, tekserý, óz mindetterin durys oryndamaǵan merdigerlerdi jaýapqa shaqyrý polısııanyń emes, «Jol sapasyn baqylaý ulttyq aktıvteri» ortalyǵynyń tikeleı mindeti. Osy rette qanshama aryz-shaǵym túskenine qaramastan osy mekemeniń Aqtóbe fılıalynyń qyzmetkerleri aryz-shaǵymdy únsiz qabyldap, ózderin beıtarap ustap keledi. Osydan-aq jol sapasyn baqylaıtyn mekemeniń qajeti bar ma degen sa­­ýal týady.

Jol jóndeýge bólinetin qarjy kólemi jylma-jyl artyp keledi. Máselen, 2019 jyly oblystyń 347,1 shaqyrym jolyn qalpyna keltirýge 19,7 mlrd teńge bólindi. Munyń 10,2 mlrd teńgesi respýblıkalyq bıýdjetten, al 9,5 mlrd teńgesi jergilikti bıýdjetten qaraldy. Osy qarjyǵa 284,9 shaqyrym oblystyq, 62,2 shaqyrym aýdanaralyq joldar ortasha jóndeýden ótti. Byltyr da dál osyndaı qajy bólindi. Biraq Aqtóbe joldarynyń asfalt jamylǵylary arysy eki-úsh jylǵa ǵana shydas beredi. Jurtshylyqtyń bıylǵy ashý-yzasy Prezıdent Q.Toqaevtyń qatań eskertýimen jáne oblystaǵy jol salasyna jaýapty eki sheneýniktiń oryndarynan ketýimen aıaqtaldy. Endigi kezekte jolǵa ketken qarjynyń esebin sýbmerdigerler qaıta jóndeý júrgizý arqyly ótemek. Qarmen birge úgitiletin asfalt quramyna, qıyrshyq tasqa, basqa da jol qurylysy materıaldarynyń sapasyna sarapshylar qorytyndy jasaýy tıis.

Bıylǵy sáýirdiń bas kúnderinde «Aqtóbe – Qandyaǵash» avtokólik jolyn qurylymdaý jumystary bastaldy. О́tken jyly oblystyń munaıly aýdandaryn baılanystyratyn osy kúretamyr jolǵa Azııa damý bankisi qarjy bóldi. «Atyraý-Aqtóbe (Astrahan, RF shekarasy) respýblıkalyq mańyzy bar avtokólik jolynyń bir bóligi bolyp sanalatyn osy joba 2023 jyly aıaqtalady dep josparlandy. Qazir 80 shaqyrymy tórt jolaqty etip keńeıtile bastady. О́tken jyldyń 24 qarashasynda ótkizilgen tender qorytyndysy boıynsha «Aqtóbe – Qandyaǵash» tasjolynyń jobalyq quny 39,8 mlrd teńgege belgilenip, jóndeý jumystaryn eki kompanııa bólip aldy. Bas merdigerleri – «Sıne Mıdas stroı» men Todini costruzioni generali S.p.A kompanııalary. Sońǵysynyń bas keńsesi Túrkııada tirkelgen. Jol jobasynyń ekinshi bóligi – 52 shaqyrymnan 100 shaqyrymǵa deıingi aralyǵyn (Qandyaǵash qalasyna kiretin) «Aq jol qurylys» JShS-i, ázerbaıjandyq AzVirt kompanııasy jáne aqtóbelik «Astana-DorStroı» JShS-i salatyn boldy. Onyń jobalyq-smetalyq quny – 22,8 mlrd teńge dep bekitildi.

 

Aqtóbe oblysy

 

Sońǵy jańalyqtar

Araq satylmaıtyn aýdan

Aımaqtar • Keshe

Erlikke toly sýretter

Rýhanııat • Keshe

Uqsas jańalyqtar