Sport • 23 Sáýir, 2021

Talapty qyz Tálipova

66 ret kórsetildi

Kúni keshe ǵana Polshanyń Kels qalasynda bokstan jastar arasyndaǵy álem birinshiligi aıaqtaldy. Bul jarysta Qazaqstannyń bylǵary qolǵap sheberleri tabysty óner kórsetip, barsha jankúıerlerdiń alǵysyna bólendi.

Aıtýly jarysta Qazaqstan quramasynyń qorjynyna al­ǵashqy júldeni salǵan Almaty oblysynyń týmasy Eldana Táli­pova ekeni barshaǵa málim. Asa aýyr salmaq dárejesinde kúsh sy­nasqan qazaq qyzy shırek fınal­dyq saıysta Ýkraınanyń ókili Vıktorııa Levchýkti ekinshi raýndta esinen tandyryp, jartylaı fınalǵa joldama aldy. Biraq bul mejede Eldananyń joly bol­mady. Asa shıelenisti ótken básekede ol Moldova boksshysy Darııa Kozorezge ese jiberip, qola medaldy qanaǵat tutty. Desek te, Tálipovanyń Polshadaǵy óneri mamandar tarapynan joǵary ba­ǵalandy.

Keshe Eldana Tálipovanyń alǵash­qy bapkeri Darhan Qabylan­be­kovpen jolyǵyp, aıtýly byl­ǵary qolǵap sheberi jaıynda biraz maǵlumat aldyq. Darhannyń ózi de kezinde osy sport túrimen shu­ǵyl­danyp, azdy-kópti tabystarǵa qol jetkizgen eken. Sonymen qa­tar kıkboks jáne qoıan-qoltyq aı­qas­tan da túrli jarystarda óner kórsetip, biraz jarysta qan­jyǵasy maılanypty. Qazirgi kezde Darhan óziniń dosy, Qazaqstan Respýblıkasynyń eńbek si­ńirgen jattyqtyrýshysy Dastan Sádýaqasovpen «Daryn» promoý­terlik kompanııasyn quryp, otan­dyq kásipqoı boksty damytýǵa barynsha atsalysýda. Aıtýly promoýshenniń uıymdastyrýymen Jetisý óńirinde birqatar dúbirli dodanyń uıymdastyrylǵanyn jankúıerler jaqsy biledi. 

–  Men birer jyl Almaty obly­synyń Ile aýdanynda bapker bolyp eńbek etip, boks óne­ri­ne ańsary aýǵan jastardy jat­tyq­tyrdym. Solardyń qataryn­da Eldana Tálipova da bar. Men ony «Qazsıktegi» orta mek­teptiń segizinshi synybynda oqyp júrgen kezinde baıqadym. О́z qurbylarynan boıy edáýir uzyn qyzǵa birden nazarym aýyp, oǵan bokspen aınalysý jaıynda usynys aıttym. Aldymen Elda­na­nyń apasy Jupar Omarovadan ruqsat surap, sol kisiniń aq batasyn aldym. Sodan jattyǵý ju­mystaryna kirisip, shákirtimniń she­berligin ábden shyńdadym. Nátı­jesi jaman bolǵan joq. Elda­na ózi qatysqan jarystardyń bar­lyǵynda júldeli oryndardy ıele­nip, únemi jeńis tuǵyryna kóte­rildi. Mine, endi jastar ara­syndaǵy álem birinshiliginde qola medaldy moınyna ildi. Men shá­kirtime dán rızamyn. Aldaǵy ýaqytta Eldananyń baǵyn­dyr­ǵan belesteri budan da bıik bolaty­nyna óz basym esh shúbá keltir­meımin, – dep Darhan Qabylan­bekov aǵynan jaryldy.

Aıtqandaı-aq Eldana Tálipova qysqa ǵana merzim aralyǵynda óz qurbylarynyń aldy boldy. Orta mektepte oqyp júrgen keziniń ózinde birqatar respýblıkalyq jáne halyqaralyq týrnırde atoı saldy. Áli esimizde, 2017 jy­ly 15 jastaǵy Eldana Shvesııaǵa sa­par shegip, «Altyn qyzdar» dep atalatyn dúbirli dodada altyn­nan alqa taqty. Fınaldyq sa­ıysta ol ırlandııalyq Loren La­ıondy 90 sekýnd aralyǵynda uryp jyqqany jaıynda sol kezde barlyq gazetter jarysa jazǵan edi. Sodan keıin Ýkraına, Reseı jáne taǵy basqa memleketterde jalaýy jelbiregen jarystarda Tálipova bas júldeni oljalady.

Jasóspirimder men jastar býyny arasyndaǵy Qazaqstan birinshiliginde qarsylas shaq keltirmegen Eldana Tálipova bıyl Polshada ótken álemdik do­da­da Qazaq eliniń namysyn qorǵa­dy. Jaýapty jarysta ol jankúıer­ler senimine selkeý túsirmeı, elge qola medalmen oraldy. Elda­nanyń endigi maqsaty – Qazaq­stannyń qyzdar quramasy sapyna enip, baıraqty básekelerde el namysyn abyroıly qorǵaý.

 

Sońǵy jańalyqtar

Shýchede jańa sport kesheni salynady

Aımaqtar • Búgin, 18:59

Erlikke toly sýretter

Rýhanııat • Búgin, 13:05

Kıikterdiń tóldeý kezeńi bastaldy

Fotogalereıa • Búgin, 12:07

Qazaqstannyń altyn-valıýta qory ósti

Ekonomıka • Búgin, 12:02

Pavlodarda avtobýs baǵanǵa soǵyldy

Oqıǵa • Búgin, 09:54

Batys Qazaqstanda kıikter ólip jatyr

Aımaqtar • Búgin, 09:44

Uqsas jańalyqtar