Jergilikti bıliktiń habarlaýynsha, KRI Nanggala-402 dep atalatyn qaıyq Balıden 100 shaqyrym jerde iz-túzsiz ketken. Izdeý jumystaryna 400-ge jýyq adam, 6 keme jáne 1 tikushaq jumyldyrylǵan.
Súńgýir qaıyq Balıdiń mańyndaǵy tereń sýlarda jattyǵý jasaýy tıis bolatyn. Biraq keı derekkózderdiń habarlaýynsha, keme jattyǵýǵa kiriskennen keıin keri baılanysqa shyqpaǵan.
Osyǵan baılanysty Indonezııa bıligi súńgýir qaıyqty tabý úshin Aýstralııa men Sıngapýrdan kómek surady. Budan bólek, AQSh, Aýstralııa, Fransııa jáne Germanııa kómek qolyn sozýǵa daıyn.
Súńgýir qaıyq joǵalǵan mańnan sý betine janarmaı tógilgeni anyqtalyp otyr. Keı sarapshylardyń aıtýynsha, sýasty kemesinen aqaý shyǵýy múmkin. Áıtse de, endi bir sarapshylar sýǵa janarmaı tógý arqyly bort músheleri habar berýge tyrysýy yqtımal ekenin de aıtady.
Joǵalyp ketken sýasty kemesi – Indonezııa áskerı flotyna tıesili 5 súńgýir qaıyqtyń bireýi. Ol 1970-shi jyldary qurastyrylǵan. 2012 jyly Ońtústik Koreıada kúrdeli jóndeýden ótken.
