Jaýapty vedomstvoǵa qarasty Sıfrlandyrý departamentiniń aqparatyna súıensek, bul joba tólemder men barlyq kedendik operasııany jeńildetip, sondaı-aq tutynýshylarǵa kórsetiletin qyzmet sapasyn jaqsartýǵa arnalǵan. Buǵan qosa elektrondy saýda operatory ınstıtýtynyń engizilýi kedendik ákimshilik sharalardy jedeldetip, ınternet saýdadaǵy rásimderdi ońtaılandyrýy tıis.
Saýda jáne ıntegrasııa vıse-mınıstri Ásel Janasovanyń aıtýynsha, ýákiletti operator taýarlardy deklarasııalap, klıentterdiń ornyna kedendik tólemderdi tóleıtin bolady.
«Qanatqaqty jobany bıyl shildeden bastap, 2022 jyldyń jeltoqsanyna deıin júzege asyrý usynylyp otyr. Osy aralyqta EAEO aýmaǵynda syrtqy elektrondy saýdany retteý salasyndaǵy normatıvtik-quqyqtyq bazany qalyptastyrýǵa múmkindik týady. Sondaı-aq osy jobanyń aıasynda ishki tutyný naryǵyndaǵy taýarlar tasymalyn tıisti mekenine deıin jetkizý úshin keden qoımasyna elektrondy saýda taýarlaryn ornalastyryp jiberý tetigi synaq retinde pysyqtalady», dedi vıse-mınıstr.
Demek, jeke tulǵalarǵa arnalǵan elektrondy taýar saýdasyn damytý maqsatynda Bond qoımalarynyń (Bonded warehouse - ákelingen taýardy kedendik baj, qosylǵan qun salyǵy men aksızsiz, sondaı-aq lısenzııalaý men kvotany qoldanbaı kedendik baqylaýda saqtaýǵa múmkindik beretin ortaq qoıma) modelin paıdalaný múmkindigi qarastyrylady. Osy amal EAEO-ǵa múshe memleketterge Bond qoımalarynyń ınstıtýtyn rettep, jumysyn jolǵa qoıý boıynsha tájirıbe almasýǵa jol ashady dedi mınıstrlik ókilderi.
«Bond qoımalardy paıdalaný tetigin jetildirý bızneske qolaıly jaǵdaı týdyryp, Qazaqstanǵa iri oıynshylardy tartýǵa septesedi. Sonymen qosa Bond qoımalarynyń assortımentin tolyqtyrýǵa Qytaıdan jáne basqa da elderden turaqty logıstıkalyq baǵyttardy qamtamasyz etýge múmkindik beredi», dedi Sıfrlandyrý departamentiniń mamandary.
Sala ókilderi aıtqandaı, mundaı qoımanyń modelin damytý qoldanystaǵy ınfraqurylymdy tıimdi paıdalanyp, ulttyq tasymaldaýshylardy (avıa/avto) turaqty júk aǵyndarymen qamtýmen birge tapsyrystardy óńdeý úshin qosymsha jumys oryndaryn qurýdy qamtamasyz etedi.
Tutastaı alǵanda, osy arqyly satylatyn taýarlar assortımenti men sanattaryn keńeıtip, onlaın-saıttardaǵy saýda kólemin kóbeıtý jáne jetkizý merzimin nysanaly núktesine deıin qysqartý kózdelip otyr.
