Kıno • 30 Sáýir, 2021

Almatyda jańa baǵyttaǵy Medıa jáne kıno mektebi ashylady

100 ret kórsetildi

Sháken Aımanov atyndaǵy «Qazaqfılm» AQ jáne Almaty Menedjment Ýnıversıtetiniń birlesken quryltaıshylyǵymen Almatyda jańa formattaǵy Medıa jáne kıno mektebi (Media & Film School) ashyldy, dep habarlaıdy Egemen.kz

Jańa bilim ordasynyń ashylýyna oraı baspasóz otyrysy uıymdastyrylyp, bolashaq bilim ortalyǵynyń maqsat-mańyzy týraly keńinen áńgimelendi. 

AlmaU Kásipkerlik Ýnıversıteti naryq talaptary men óziniń strategııalyq maqsattaryna sáıkes ınnovasııalyq bilim berý baǵdarlamalaryn qurastyrýda. Qazirgi kezde synı turǵydan oılaı alatyn, etıkalyq qundylyqtarǵa ıe, tereń bilimi bar jáne jańa tehnologııalardy meńgergen mamandarǵa suranys joǵary bolyp otyrǵan salalardyń biri – kreatıv ındýstrııa, atap aıtqanda, medıa jáne kıno baǵyty. Qazaqstanda 40-tan astam jýrnalıstıka mektebi men 3 kıno mektebi jumys isteıtinine qaramastan, sapaly kadr máselesi tapshy bolyp otyr.

Jańa mekteptiń maqsaty – eldegi kreatıv ındýstrııanyń damýyna belsendi úles qosatyn, buqaralyq aqparat quraldary men kıno naryǵynyń zamanaýı talaptaryna saı keletin mamandardy daıarlaý.

Alǵashqy stýdentterdi oqýǵa qabyldaý 2021-2022 oqý jylynda bastalady. Jańa mekteptiń basty mindeti – qajetti ınfraqurylymdy qalyptastyrý. Media & Film School mektebiniń tehnıkalyq jáne ıntellektýal bazasyn jasaýǵa Sh.Aımanov atyndaǵy «Qazaqfılm» AQ kınostýdııasy atsalysatyn bolady.

AlmaU rektory Erbol Súleımenov jańa mekteptiń artyqshylyǵy jaıly «Qazaqfılm» – ózindik mańyzdy tarıhy bar jáne qazirgi baǵyttardy qalyptastyratyn elimizdiń basty kınoalańy. Osyǵan oraı kınostýdııa basshylyǵynyń bizdiń yntymaqtastyq ıdeıamyzdy qoldaǵanyna qýanyshtymyz» dep atap ótti.

«Qazirgi tańda otandyq kıno salasy kásibı mamandarǵa zárý. Tehnologııa jáne shyǵarmashylyq baǵyty búginde tez ózgerip jatqan zamanda kınoındýstrııada tabysqa jetý úshin álemdik baǵyt aǵymdarǵa ǵana súıenip qoımaı, sonymen birge óz ereksheligimen tańǵaldyrý qajet. Memleket basshysy óz joldaýynda bilimniń qol jetimdiligi men sapasyn arttyrýdyń mańyzdylyǵyn atap ótti. Qazaqstannyń eń úzdik ýnıversıtetteriniń biri AlmaU-diń zaman talaptaryna der kezinde jaýap qatatyn osynaý bastamaǵa seriktes bolyp birlese jumys jasap jatqanymyzǵa qýanyshtymyz», dedi Sh.Aımanov atyndaǵy «Qazaqfılm» AQ vıse-prezıdenti Aıdar Batalov.

«Media & Film School baǵdarlamasyna engizilgen pánder álemdegi jetekshi oqý baǵdarlamalaryna negizdeledi, al oqytýshylary – kásibı biliktiligi ǵylymı-tájirıbelik jumystarmen rastalǵan mamandar. Bıyldan bastap biz birneshe mamandyqtardy eksperımantti baǵyt túrinde ashamyz, atap aıtsaq: Kreatıv óner oqý baǵdarlamasy, Jańa medıa oqý baǵdarlamasy jáne Dıdjıtal mádenıet oqý baǵdarlamasy dep atalatyn 3 oqý baǵdarlamasy boıynsha Dıdjıtal kıno rejısseri jáne montaj rejısseri, dıdjıtal geım-dızaıny, data jýrnalıstıka jáne mobıl jýrnalıstıka jáne dıdjıtal kıno syny mamandary daıarlanatyn bolady», dedi Media & Film School mektebiniń dekany PhD Moldııar Ergebekov.

«Arızona Ýnıversıtetindegi amerıkalyq bilim berýdiń jańa tehnologııalary men joǵary standarttary, otandyq kınematografısterdiń tájirıbesi men ​Qazaqfılm​ kınostýdııasynyń túsirilim alańdary jáne AlmaU-diń myqty bazasy – munyń bári Medıa jáne kıno mektebiniń qalyptasyp jańa sapaǵa jetýiniń jáne elimizdegi medıa men kıno salasy úshin kásibılerdi daıarlaýdyń kepili», dep atap ótti Qazaqstan kınosynshylary qaýymdastyǵynyń prezıdenti Gúlnár Ábikeeva.

Sonymen qatar, spıkerler Medıa jáne kıno mektebin damytý josparlary týraly aıtty. 2021-2022 oqý jylynda mektep janynan medıa jáne kınematografııa salasyndaǵy ınterdıssıplınar zertteýlermen aınalysatyn Medıa jáne kıno ınstıtýty ashylady. Kelesi jyly jýrnalıstıka, teledıdar jáne radıojýrnalıstıka, anımasııa, grafıkalyq dızaın, dramatýrgııa jáne taǵy da basqa mamandyqtar ashylady.

Baspasóz otyrysy sońynda Sh.Aımanov atyndaǵy «Qazaqfılm» kınostýdııasynyń vıse-prezıdenti Aıdar Batalov jáne AlmaU rektory Erbol Súleımenov Yntymaqtastyq týraly Memorandýmǵa qol qoıdy.


ALMATY

Sońǵy jańalyqtar

Uqsas jańalyqtar