– Árıne, shaǵyn óleńder sátine qaraı jazyla beredi ǵoı. Sońǵy jyldary birtalaı kólemdi dúnıeler ákelippin. «Kishi Qııamettegi Qazaqstan» atty áfsana-hıkaıa dastandar shoǵyry, «Baba-dastan» degen tarıhı dastandar sıkli aıasyndaǵy shyǵarmalar, dramalyq týyndylar, tárjimalar, esseler dúnıege keldi. Olardyń áli de jazyla beretin túri bar. Sondaı-aq, «Maǵdaýııat maıdany» atty sınkretti sıpattaǵy eki tom eńbek jazylý ústinde. Ekinshi tomynyń tynǵysy qoıylýǵa taqaý… Aıtpaqshy, bular neken-nuqan bolmasa, ázir tutastaı baspa júzin kóre qoıǵan joq. Ázirge – osy.
Al jazylmaı, tolǵaǵy jetpeı, kilti tabylmaı jatqan nárseler shash-etekten… Bir parasyn ǵana aıtaıyn. Meniń Uly bı Edige, Han Toqtamys, Ámir Temir zamany týraly tolǵanǵanyma biraz boldy. Kilti qolǵa túspeı júr. Tússe, qalǵany qıyn bolmas edi. Áz Táýkeniń sardary, qazaq jadynda talaı ertek-ańyzdarǵa arqaý bolǵan Esenǵululy Esek-Mergen batyr jaıly tarıhı-pýblısıstıkalyq janrdaǵy eńbek jazǵym kelip júr. Materıaldary daıyn, biraq ishki daıyndyǵym pispeı jatyr. Odan keıin, kópten uly jobasy keýdemde qalanyp jatqan «Tas kitapqa» kirisetin shyǵarmyn. Qalǵanyn Qudaı ǵumyr berse, ýaqyt kórseter… «Semizdeý sóılep» qoısam, mártebeli oqyrmannan aldyn-ala ǵafý ótinemin. Barym – osy.
– Shyǵarmashylyq syryńyzben bóliskenińizge rahmet.
