Mysaly, Qorqyt ata jáne Iаssaýı kósheleriniń qıylysyndaǵy 1 myń 123 sharshy metr aýmaqty alyp jatqan «Kelmenbet batyr» saıabaǵyna ESV-6 nasos qondyrǵysy arqyly 80 metr tereńdikten sý tartylyp, atalǵan aýmaqtaǵy jasyl jelekti sýmen qamtý múmkin bolyp otyr.
Jer asty uńǵymasy arqyly sýarylatyn taǵy bir nysan temir jol parki. Munda da demeýshilik esebinen 80 metr tereńdikten sý tartatyn ESV-6 nasos qondyrǵysy qoıylyp, 2 myń 450 sharshy metrdi quraıtyn park aýmaǵy aıaq sýmen tolyq qamtylǵan.
Osy máselege baılanysty oblys ortalyǵyn aralaǵan qala ákimi Ǵanıbek Qazantaev ótken jyly qaıta jańǵyrtýdan ótken parktiń kórkeıtý-kógaldandyrýdy jandandyrýdy tapsyrdy. Parkte sýburqaq, balalar oıyn alańy men 2 sport jáne jattyǵý alańy jumys isteýde.
Taǵzym memorıalynyń aýmaǵy da bıyldan bastap jer asty uńǵymasy arqyly sýarylyp, tolyǵymen kógaldandyrylǵan. Qazirgi tańda munda gúl egý jumystary júrgizilýde.
Aralaý barysynda qala ákimi aryq júıeleriniń de jaǵdaıyn kórip, shahar ortalyǵyndaǵy aıaq sýdyń jaıyn túbegeıli sheshý máselesin sala mamandarymen birge talqyǵa saldy.
Qala negizgi aryq júıeleri bıylǵa deıin Jibek joly jáne Sarqyrama mangıstraldi kanaldary arqyly sýmen qamtylyp kelgen. Sáýir aıynyń aıaǵynda Sarqyrama kanalyna sý jiberilgenimen darııa deńgeıiniń tómendeýi aryq júıelerin aıaq sýmen qamtýdy qıyndatyp tur. Osy máseleni sheshý úshin qala ákimi Jibek joly men Sarqyramany qalalyq kanal arqyly biriktirýdi mamandarmen aqyldasyp, sala basshylaryna tıisti jumystardy júrgizýge tapsyrma berdi. Ǵanıbek Qonysbekuly «Eki kanaldy baılanystyryp, Jibek joly arqyly Sarqyrama kanalyna sý berý, qala ortalyǵyn aıaq sýmen qamtýdyń tyń tásili bolmaq», dedi.
Qala bashysy shahar ortalyǵy nemese shet aımaq dep bólmeı, tolyq aıaq sýmen qamtylýyn óz qadaǵalýynda ustaıtynyn jetkizdi.
